ബെംഗളൂരു: വിവാഹാഭ്യർത്ഥന നിരസിച്ചതിലുള്ള വൈരാഗ്യത്തിൽ 23-കാരിയെ യുവാവ് പൊതുസ്ഥലത്ത് കുത്തിക്കൊന്നു. ബെംഗളൂരുവിലെ മഹാലക്ഷ്മി ലേഔട്ട് മേഖലയിലാണ് ഞെട്ടിക്കുന്ന സംഭവം. സംഭവവുമായി ബന്ധപ്പെട്ട് യുവതിയുടെ സുഹൃത്തായ രാജീവിനെ പൊലീസ് അറസ്റ്റ് ചെയ്തു.
പൊലീസിന്റെ പ്രാഥമിക അന്വേഷണത്തിൽ, കഴിഞ്ഞ നാല് വർഷമായി ഇരുവരും പ്രണയത്തിലായിരുന്നുവെന്ന് കണ്ടെത്തി. ഒരേ സ്ഥാപനത്തിൽ ജോലി ചെയ്യുന്നതിനിടെയായിരുന്നു പരിചയം. എന്നാൽ യുവാവുമായുള്ള വിവാഹത്തിന് യുവതിയുടെ കുടുംബം എതിർപ്പ് പ്രകടിപ്പിച്ചതോടെ ബന്ധത്തിൽ അകൽച്ചയുണ്ടായി. ഇതിനിടെ യുവതി ബന്ധത്തിൽ നിന്ന് പിന്മാറാൻ ശ്രമിച്ചതായും അന്വേഷണസംഘം വ്യക്തമാക്കി.
സംഭവദിവസം രാത്രി അത്താഴത്തിനായി കാണാമെന്ന് പറഞ്ഞ് യുവാവ് യുവതിയെ മഹാലക്ഷ്മി ലേഔട്ടിന് സമീപത്തെ സ്ഥലത്തേക്ക് വിളിച്ചുവരുത്തി. അവിടെ വീണ്ടും വിവാഹത്തെക്കുറിച്ച് സംസാരിച്ചെങ്കിലും യുവതി നിരസിച്ച് മടങ്ങാൻ ശ്രമിച്ചു. ഇതോടെ പിന്നാലെ എത്തിയ പ്രതി കൈവശമുണ്ടായിരുന്ന കത്തി ഉപയോഗിച്ച് കഴുത്തിൽ ആക്രമിക്കുകയായിരുന്നുവെന്നാണ് പൊലീസ് പറയുന്നത്.
രക്തത്തിൽ കുളിച്ചുവീണ യുവതിയെ സമീപത്തുണ്ടായിരുന്നവർ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. വിവരം ലഭിച്ച പൊലീസ് അതിവേഗം സ്ഥലത്തെത്തി പ്രതിയെ സമീപപ്രദേശത്ത് നിന്ന് കസ്റ്റഡിയിലെടുക്കുകയായിരുന്നു. ചോദ്യംചെയ്യലിൽ പ്രതി കുറ്റം സമ്മതിച്ചതായും പൊലീസ് അറിയിച്ചു. മൃതദേഹം പോസ്റ്റ്മോർട്ടത്തിനായി മാറ്റിയിട്ടുണ്ട്.
