തിരുവനന്തപുരം: സഹകരണ മേഖലയിലെ വിദ്യാഭ്യാസ സ്ഥാപനങ്ങളിലെ ഫീസ് വര്ധന പിന്വലിക്കണമെന്നാവശ്യപ്പെട്ട് സെക്രട്ടേറിയറ്റിലേക്ക് എസ്എഫ്ഐ നടത്തിയ മാര്ച്ചിനിടെ ഉണ്ടായ സംഘര്ഷവുമായി ബന്ധപ്പെട്ട് തിരുവനന്തപുരം ജില്ലാ പ്രസിഡന്റ് നന്ദനെ പൊലീസ് അറസ്റ്റ് ചെയ്തു.
ബ്ലേഡ് ഉപയോഗിച്ച് പൊലീസ് ബാരിക്കേഡില് കെട്ടിയിരുന്ന കയര് മുറിച്ചെന്നതാണ് കേസ്. സംഭവത്തില് എസ്എഫ്ഐ സംസ്ഥാന നേതാക്കളടക്കം കണ്ടാലറിയാവുന്ന 100 പേര്ക്കെതിരെയാണ് പൊലീസ് കേസെടുത്തിരിക്കുന്നത്. നേരത്തെ സംസ്ഥാന ഭാരവാഹികള് ഉള്പ്പെടെ 10 പേര്ക്കെതിരെ കേസെടുത്തിരുന്നു.
ബാരിക്കേഡിലെ കയര് മുറിച്ചതിലൂടെ സര്ക്കാര് സ്വത്തിന് 10,000 രൂപയുടെ നാശനഷ്ടമുണ്ടായെന്നാണ് എഫ്.ഐ.ആറില് പറയുന്നത്. യൂണിവേഴ്സിറ്റി കോളേജില് നിന്ന് ആരംഭിച്ച മാര്ച്ച് സെക്രട്ടേറിയറ്റിന് സമീപമെത്തിയപ്പോഴാണ് സംഘര്ഷമുണ്ടായത്. മാര്ച്ചിനിടെ പ്രതിപക്ഷ നേതാവ് വി.ഡി. സതീശന്റെ ഫ്ലെക്സ് ബോര്ഡും കൊടികളും നശിപ്പിച്ചതായും പൊലീസ് ആരോപിക്കുന്നു.
തുടര്ന്ന് ബാരിക്കേഡ് തള്ളിമാറ്റാന് പ്രവര്ത്തകര് ശ്രമിച്ചതോടെ പൊലീസ് ജലപീരങ്കി പ്രയോഗിക്കുകയും പിന്നീട് നാല് തവണ ലാത്തിച്ചാര്ജ് നടത്തുകയും ചെയ്തു. സംഘര്ഷത്തിനിടെ സംഭവസ്ഥലത്ത് നിന്ന് ബ്ലേഡുകള് കണ്ടെത്തിയതും അന്വേഷണത്തിലെ പ്രധാന തെളിവായാണ് പൊലീസ് ചൂണ്ടിക്കാട്ടുന്നത്. ബാരിക്കേഡിലെ കയര് മുറിക്കാനാണ് എസ്എഫ്ഐ പ്രവര്ത്തകര് ബ്ലേഡ് കൊണ്ടുവന്നതെന്നാണ് പൊലീസ് നിലപാട്. സംഭവവുമായി ബന്ധപ്പെട്ട് പൊലീസ് അന്വേഷണം തുടരുകയാണ്.
