കൊച്ചി:’നന്ദനം’ സിനിമയിലെ ഉണ്ണിയേട്ടനായി മലയാളികളുടെ ഹൃദയം കീഴടക്കിയ നടൻ അരവിന്ദ് ആകാശ് വിവാഹിതനായി. 50-ാം വയസിലാണ് താരം ജീവിതത്തിലെ പുതിയ അധ്യായത്തിന് തുടക്കമിട്ടത്. മലേഷ്യൻ തമിഴ് യുവതിയായ സാറയാണ് വധു. മലേഷ്യയിലെ ക്വാലാലംപൂർ നഗരത്തിൽ അടുത്ത ബന്ധുക്കളുടെയും സിനിമാരംഗത്തെ സുഹൃത്തുക്കളുടെയും സാന്നിധ്യത്തിലായിരുന്നു വിവാഹച്ചടങ്ങുകൾ.
വിവാഹചടങ്ങിന്റെ ചിത്രങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ ആരാധകരും സഹപ്രവർത്തകരും നവദമ്പതികൾക്ക് ആശംസകളുമായെത്തി. തമിഴ് സംവിധായകൻ വെങ്കട് പ്രഭു ഉൾപ്പെടെയുള്ള സിനിമാ സുഹൃത്തുക്കളും ചടങ്ങിൽ പങ്കെടുത്തതായി റിപ്പോർട്ടുകളുണ്ട്.
2002-ൽ പുറത്തിറങ്ങിയ നന്ദനം എന്ന ചിത്രത്തിൽ ഗുരുവായൂരപ്പന്റെ പ്രതീകമായ ഉണ്ണികൃഷ്ണൻ എന്ന കഥാപാത്രത്തെ അവതരിപ്പിച്ചാണ് അരവിന്ദ് ആകാശ് മലയാളി പ്രേക്ഷകരുടെ പ്രിയതാരമായത്. ആ കഥാപാത്രം ഇന്നും മലയാള സിനിമയിലെ ഏറ്റവും ശ്രദ്ധേയമായ വേഷങ്ങളിലൊന്നായി വിലയിരുത്തപ്പെടുന്നു.
തുടർന്ന് മമ്മി ആൻഡ് മീ, ക്ലൈമാക്സ്, പ്രജാപതി, വാണ്ടഡ്, പൊന്മുടിപ്പുഴയോരത്ത് തുടങ്ങി നിരവധി മലയാള ചിത്രങ്ങളിലും താരം അഭിനയിച്ചു. തമിഴിലും താരം സജീവമായിരുന്നു.
അടുത്തിടെ പുറത്തിറങ്ങിയ ഗുരുവായൂർ അമ്പലനടയിൽ എന്ന ചിത്രത്തിലും ‘നന്ദനം’ സിനിമയെ ഓർമ്മിപ്പിക്കുന്ന പ്രത്യേക അതിഥിവേഷത്തിൽ അരവിന്ദ് ആകാശ് പ്രത്യക്ഷപ്പെട്ടിരുന്നു. ടെലിവിഷൻ റിയാലിറ്റി ഷോകളിലെ വിധികർത്താവായും മെന്ററായും മലയാളികൾക്ക് സുപരിചിതനാണ് താരം.
