ജോർജ് സാറും അഞ്ച് യുവ പൊലീസ് ഓഫീസർമാരും ചേർന്ന് ക്രമസമാധാനത്തിന്റെ പുതിയ കഥ പറയാൻ എത്തുന്നു. ‘ലോ ആൻഡ് ഓർഡർ’ എന്ന ചിത്രത്തിന്റെ പുതിയ പോസ്റ്റർ സിനിമാപ്രേമികൾക്കിടയിൽ ശ്രദ്ധ നേടുകയാണ്. ജൂലൈ 24ന് ചിത്രം തിയറ്ററുകളിലെത്തുമെന്ന് പ്രഖ്യാപിച്ചുകൊണ്ടാണ് പുതിയ പോസ്റ്റർ പുറത്തിറക്കിയത്.
‘തുടരും’ സിനിമയിലൂടെ പ്രേക്ഷകരുടെ ശ്രദ്ധ പിടിച്ചുപറ്റിയ ജോർജ് സാറിനെ അവതരിപ്പിച്ച പ്രകാശ് വർമയുടെ പൊലീസ് യൂണിഫോമിലുള്ള വലിയ രൂപമാണ് പോസ്റ്ററിന്റെ കേന്ദ്ര ആകർഷണം. താഴെ ഓടുന്ന അഞ്ച് യുവാക്കൾ—അവരിൽ മൂന്നുപേർ പൊലീസ് യൂണിഫോമിലും രണ്ടുപേർ സിവിൽ വേഷത്തിലുമാണ്. ഇവരും പൊലീസ് കഥാപാത്രങ്ങളാണെന്ന സൂചനയാണ് പോസ്റ്റർ നൽകുന്നത്. ആദ്യനോട്ടത്തിൽ തന്നെ ഒരു ത്രില്ലിംഗ് പൊലീസ് ആക്ഷൻ ചിത്രത്തിന്റെ ഭാവമാണ് പോസ്റ്റർ സൃഷ്ടിക്കുന്നത്.
സംവിധായകൻ രഞ്ജിത്ത് ഒരുക്കുന്ന ‘ലോ ആൻഡ് ഓർഡർ’ വലിയ കാൻവാസിലുള്ള ഒരു മാസ് ആക്ഷൻ എന്റർടെയ്നറായാണ് എത്തുന്നത്. സത്യം സിനിമാസിന്റെയും മഹാ സുബൈർ മൂവി ക്ഷേത്രയുടെയും ബാനറിൽ പ്രേമചന്ദ്രൻ എ.ജി, മഹാ സുബൈർ എന്നിവർ ചേർന്നാണ് ചിത്രം നിർമിക്കുന്നത്. ഉദയ് കൃഷ്ണയാണ് തിരക്കഥ.
ക്രമസമാധാനം ഉറപ്പാക്കാനുള്ള ഉത്തരവാദിത്തത്തോടെ നിയമിക്കപ്പെട്ട അഞ്ച് യുവ സബ് ഇൻസ്പെക്ടർമാരുടെയും അവർക്കു വഴികാട്ടിയും കരുത്തുമായ ഒരു മുതിർന്ന പൊലീസ് ഓഫീസറുടെയും ഔദ്യോഗിക ജീവിതത്തിലൂടെയാണ് കഥ മുന്നോട്ട് പോകുന്നത്. ആക്ഷന് വലിയ പ്രാധാന്യം നൽകിയാണ് ചിത്രം ഒരുക്കുന്നത്.
ഏകദേശം 90 ദിവസം നീണ്ട ചിത്രീകരണം കൊച്ചി, തിരുവനന്തപുരം, കോട്ടയം, വയനാട്, കണ്ണൂർ എന്നിവിടങ്ങളിലായി പൂർത്തിയായി. വലിയ മുതൽമുടക്കിലാണ് ചിത്രം നിർമ്മിച്ചിരിക്കുന്നത്.
പ്രകാശ് വർമയ്‌ക്കൊപ്പം അഭിരാമിയും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നു. സമീപകാലത്ത് ‘ബ്ലാസ്റ്റ്’ എന്ന ചിത്രത്തിലൂടെ ശ്രദ്ധ നേടിയ അഭിരാമിയുടെ തിരിച്ചുവരവ് കൂടിയാണ് ഈ ചിത്രം.
ഋതു ദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൽ സുദർശൻ, നിജാദ് ബാബു തോമസ്, ഷേർഷ ഷെരിഫ്, റിനോഷ് ജോർജ്, അമൽ ജോസ് ആന്റണി, ബോബി കുര്യൻ, വി.കെ. പ്രകാശ്, സുരേഷ് കൃഷ്ണ, ജോയ് മാത്യു, ദേവൻ, ആനന്ദ് മൻമഥൻ, ജോണി ആന്റണി, ഭീമൻ രഘു, നന്ദു, ജെയ്സ് ജോസ്, അസിം ജമാൽ, ഗായത്രി അശോക്, അജയ് വാസുദേവ്, ശങ്കർ രാമകൃഷ്ണൻ, നന്ദൻ ഉണ്ണി, അക്ഷയ് രാധാകൃഷ്ണൻ, മോഹൻ ജോസ്, മാധുരി, സാബുമോൻ, ഗുണ്ടുകാട് സാബു, മുരുകൻ, സന്ധ്യ രാജേന്ദ്രൻ, വൈഷ്ണവി, രമാദേവി, അംബിക നായർ എന്നിവരും ചിത്രത്തിലെ പ്രധാന താരങ്ങളാണ്.
ഷിബു ചക്രവർത്തിയുടെ വരികൾക്ക് ജോ ഡാനിയേൽ സംഗീതം ഒരുക്കുന്നു. ബിജിബാലാണ് പശ്ചാത്തല സംഗീതം. പ്രശാന്ത് രവീന്ദ്രൻ ഛായാഗ്രഹണം നിർവഹിക്കുമ്പോൾ മനോജ് കണ്ണോത്ത് എഡിറ്റിംഗ് കൈകാര്യം ചെയ്യുന്നു. കലാസംവിധാനം സാബു റാം, മേക്കപ്പ് റോഷൻ എൻ.ജി, വസ്ത്രാലങ്കാരം സമീറ സനീഷ് എന്നിവരാണ്.
കലൈ കിംഗ്സ്റ്റൺ, ഫീനിക്സ് പ്രഭു, മാഫിയ ശശി, പി.സി സ്റ്റണ്ട്സ് എന്നിവരാണ് ചിത്രത്തിലെ ആക്ഷൻ രംഗങ്ങൾ ഒരുക്കുന്നത്. ശക്തമായ താരനിരയും ആക്ഷൻ പ്രമേയവും കൊണ്ട് ‘ലോ ആൻഡ് ഓർഡർ’ പ്രേക്ഷകരിൽ വലിയ പ്രതീക്ഷ ഉയർത്തുകയാണ്.
