ആലപ്പുഴ: ആലപ്പുഴയിലെ തുമ്പോളി എസ്.എൻ.വി.എൽ.പി സ്കൂളിലെ വിദ്യാർത്ഥികൾക്കിടയിൽ മുണ്ടിനീര് (Mumps) പടർന്നു പിടിക്കുന്ന സാഹചര്യത്തിൽ സ്കൂളിന് 21 ദിവസത്തേക്ക് അവധി പ്രഖ്യാപിച്ച് ജില്ലാ കളക്ടർ ഉത്തരവിറക്കി. രോഗത്തിന്റെ ഇൻകുബേഷൻ കാലയളവ് 21 ദിവസമാണെന്ന ജില്ലാ മെഡിക്കൽ ഓഫീസറുടെ റിപ്പോർട്ടിന്റെ അടിസ്ഥാനത്തിലാണ് നടപടി.
ജൂലൈ 1 മുതൽ മുൻകാല പ്രാബല്യത്തോടെ അവധി അനുവദിച്ചിരിക്കുകയാണ്. ഈ കാലയളവിൽ ഓൺലൈൻ ക്ലാസുകൾ നടത്താൻ ആവശ്യമായ ക്രമീകരണങ്ങൾ ജില്ലാ വിദ്യാഭ്യാസ ഉപഡയറക്ടർ ഒരുക്കണമെന്നും കളക്ടറുടെ ഉത്തരവിൽ വ്യക്തമാക്കുന്നു.
മറ്റു വിദ്യാലയങ്ങളിലേക്ക് രോഗവ്യാപനം ഉണ്ടാകാതിരിക്കാനായി ആരോഗ്യ വകുപ്പും തദ്ദേശ സ്വയംഭരണ വകുപ്പും ചേർന്ന് മുൻകരുതൽ നടപടികൾ ശക്തമാക്കാനും നിർദേശിച്ചിട്ടുണ്ട്.
എന്താണ് മുണ്ടിനീര്?
ഉമിനീര് ഉത്പാദിപ്പിക്കുന്ന ഗ്രന്ഥികളെ ബാധിക്കുന്ന വൈറസ് രോഗമാണ് മുണ്ടിനീര് (Mumps). മിക്സോ വൈറസ് പരോട്ടിഡൈറ്റിസ് എന്ന വൈറസാണ് രോഗകാരി. ചെവിക്കു താഴെയുള്ള പരോട്ടിഡ് ഗ്രന്ഥികളിൽ വീക്കവും വേദനയും ഉണ്ടാകുന്നതാണ് പ്രധാന ലക്ഷണം.
പ്രധാന ലക്ഷണങ്ങൾ
- ചെവിക്കു താഴെയോ താടിയെല്ലിന് ചുറ്റുമോ വേദനയോടുകൂടിയ വീക്കം
- ഭക്ഷണം ചവയ്ക്കാനും വിഴുങ്ങാനും ബുദ്ധിമുട്ട്
- സംസാരിക്കാൻ ബുദ്ധിമുട്ട്
- പനി, തലവേദന, ക്ഷീണം, വിശപ്പില്ലായ്മ
രോഗം പകരുന്നത് എങ്ങനെ?
ചുമ, തുമ്മൽ, ഉമിനീര് സ്രവങ്ങൾ, രോഗബാധിതരുമായി അടുത്ത സമ്പർക്കം എന്നിവയിലൂടെ മുണ്ടിനീര് വളരെ വേഗത്തിൽ പകരുന്ന പകർച്ചവ്യാധിയാണ്.
പ്രതിരോധ മാർഗങ്ങൾ
- രോഗബാധിതർ വീട്ടിൽ വിശ്രമിക്കുക
- രോഗികളുമായി സമ്പർക്കം ഒഴിവാക്കുക
- രോഗബാധിതരായ കുട്ടികളെ സ്കൂളിൽ വിടാതിരിക്കുക
- രോഗി ഉപയോഗിച്ച വസ്തുക്കൾ അണുവിമുക്തമാക്കുക
- കുട്ടികൾക്ക് എം.എം.ആർ വാക്സിൻ സമയത്ത് നൽകുക
ആരോഗ്യവകുപ്പിന്റെ നിർദേശം
അഞ്ച് മുതൽ 15 വയസ്സ് വരെയുള്ള കുട്ടികളിലാണ് രോഗം കൂടുതലായി കാണപ്പെടുന്നത്. ലക്ഷണങ്ങൾ കണ്ടാൽ ഉടൻ വൈദ്യസഹായം തേടണമെന്നും ആരോഗ്യ വകുപ്പ് അറിയിച്ചു.
