തിരുവനന്തപുരം: സംസ്ഥാനത്ത് മഴ മുന്നറിയിപ്പില് വീണ്ടും മാറ്റം വരുത്തി കേന്ദ്ര കാലാവസ്ഥ വകുപ്പ്. ഇന്ന് കേരളത്തിലെ എല്ലാ 14 ജില്ലകളിലും ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാല് യെല്ലോ അലര്ട്ട് പ്രഖ്യാപിച്ചു. ശക്തമായ കാറ്റിനും ഇടിമിന്നലിനും സാധ്യതയുണ്ടെന്നും കാലാവസ്ഥ വകുപ്പ് മുന്നറിയിപ്പ് നല്കി. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നീ ജില്ലകളിലാണ് ജാഗ്രതാ നിര്ദേശം.
24 മണിക്കൂറിനിടെ 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കാനുള്ള സാധ്യതയെയാണ് ശക്തമായ മഴയായി കണക്കാക്കുന്നത്. തെലങ്കാന മുതല് കര്ണാടക തീരത്തിനടുത്തുള്ള മധ്യ-കിഴക്കന് അറബിക്കടല് വരെ സമുദ്രനിരപ്പില് നിന്ന് 1.5 മുതല് 3.1 കിലോമീറ്റര് വരെ ഉയരത്തില് ന്യൂനമര്ദ പാത്തി രൂപപ്പെട്ടതും മധ്യ ഉത്തരപ്രദേശിന് മുകളിലെ ന്യൂനമര്ദ മേഖലയുമാണ് മഴ ശക്തിപ്പെടാന് കാരണമായിരിക്കുന്നതെന്ന് കാലാവസ്ഥ വകുപ്പ് അറിയിച്ചു. ഉത്തരപ്രദേശിന് മുകളിലെ ന്യൂനമര്ദം അടുത്ത 24 മണിക്കൂറിനുള്ളില് ദുര്ബലമാകാന് സാധ്യതയുണ്ടെങ്കിലും കേരളത്തില് മഴ തുടരുമെന്നാണ് വിലയിരുത്തല്.
ഗുജറാത്ത് മുതല് മഹാരാഷ്ട്ര തീരം വരെയുണ്ടായിരുന്ന തീരദേശ ന്യൂനമര്ദ പാത്തി ഇതിനകം ദുര്ബലമായതായും റിപ്പോര്ട്ടില് പറയുന്നു. ജൂലൈ 14 വരെ കേരളത്തിലും മാഹിയിലും ഇടത്തരം മഴയ്ക്ക് സാധ്യതയുണ്ടെന്നും ഇന്നത്തെ ദിവസം ഇടിമിന്നലോടെയും ശക്തമായ കാറ്റോടെയും കൂടിയ മഴയ്ക്ക് സാധ്യത കൂടുതലാണെന്നും മുന്നറിയിപ്പില് വ്യക്തമാക്കുന്നു. അതേസമയം, കേരള-കര്ണാടക-ലക്ഷദ്വീപ് തീരങ്ങളില് ഇന്ന് മത്സ്യബന്ധനത്തിന് പൂര്ണ വിലക്ക് ഏര്പ്പെടുത്തി. ഈ പ്രദേശങ്ങളില് മണിക്കൂറില് 40 മുതല് 50 കിലോമീറ്റര് വരെയും ചിലയിടങ്ങളില് 60 കിലോമീറ്റര് വരെയും വേഗതയില് കാറ്റ് വീശാന് സാധ്യതയുള്ളതിനാല് മത്സ്യത്തൊഴിലാളികള് കടലില് പോകരുതെന്ന് കേന്ദ്ര കാലാവസ്ഥ വകുപ്പ് നിര്ദേശിച്ചു. തീരദേശ മേഖലകളില് താമസിക്കുന്നവര് ജാഗ്രത പാലിക്കണമെന്നും അധികൃതര് മുന്നറിയിപ്പ് നല്കി.
