തിരുവനന്തപുരം: സപ്ലൈകോ കുടിശിക നല്കാത്തതില് പ്രതിഷേധിച്ച് സംസ്ഥാനത്തെ റേഷന് വാതില്പ്പടി വിതരണക്കാര് സമരത്തിലേക്ക്. ഈ മാസം 20, 21 തീയതികളില് സംസ്ഥാനവ്യാപകമായി സൂചന പണിമുടക്ക് നടത്തുമെന്ന് വിതരണക്കാര് അറിയിച്ചു. ഇതിനു ശേഷവും കുടിശിക തീര്പ്പാക്കിയില്ലെങ്കില് ഓഗസ്റ്റ് 1 മുതല് അനിശ്ചിതകാല പണിമുടക്കിലേക്ക് കടക്കുമെന്നും അവര് മുന്നറിയിപ്പ് നല്കി.
സപ്ലൈകോയില് നിന്ന് ലഭിക്കാനുള്ള കുടിശിക മാസങ്ങളായി മുടങ്ങിക്കിടക്കുകയാണെന്നും ഇതുമൂലം വാഹനവായ്പ, ഇന്ധനച്ചെലവ്, തൊഴിലാളികളുടെ വേതനം തുടങ്ങിയവ നല്കാന് കഴിയാത്ത അവസ്ഥയാണെന്നും വിതരണക്കാര് ആരോപിക്കുന്നു. നിരവധി തവണ ബന്ധപ്പെട്ട അധികൃതരുടെ ശ്രദ്ധയില് വിഷയംപ്പെടുത്തിയിട്ടും പരിഹാരമുണ്ടായില്ലെന്ന് സംഘടനാ പ്രതിനിധികള് വ്യക്തമാക്കി.
ജൂലൈ 30-നകം കുടിശിക പൂര്ണമായും അനുവദിക്കണമെന്നാണ് വിതരണക്കാരുടെ പ്രധാന ആവശ്യം. അല്ലാത്തപക്ഷം ഓഗസ്റ്റ് ഒന്നുമുതല് അനിശ്ചിതകാല സമരം ആരംഭിക്കുമെന്നും ഇതോടെ സംസ്ഥാനത്തെ റേഷന് വാതില്പ്പടി വിതരണ സംവിധാനം ഗുരുതരമായി ബാധിക്കുമെന്നും അവര് അറിയിച്ചു.
സമരം നീണ്ടാല് വയോജനങ്ങള് ഉള്പ്പെടെയുള്ള വാതില്പ്പടി റേഷന് വിതരണത്തെ ആശ്രയിക്കുന്ന ആയിരക്കണക്കിന് ഗുണഭോക്താക്കള്ക്ക് ബുദ്ധിമുട്ട് നേരിടേണ്ടി വരാനിടയുണ്ട്. അതിനാല് പ്രശ്നത്തില് അടിയന്തരമായി ഇടപെട്ട് കുടിശിക അനുവദിക്കണമെന്ന് വിതരണക്കാര് സര്ക്കാരിനോട് ആവശ്യപ്പെട്ടു.
