കോട്ടയം: കുറവിലങ്ങാട് റേഞ്ച് എക്സൈസ് സംഘത്തിന്റെ ‘ഓപ്പറേഷന്‍ തണ്ടര്‍’ പരിശോധനയില്‍ മൂന്ന് കിലോയിലധികം കഞ്ചാവുമായി ബംഗാള്‍ സ്വദേശി അറസ്റ്റില്‍. ഒഡീഷയില്‍ നിന്ന് കഞ്ചാവ് എത്തിച്ച് പ്രദേശത്ത് വില്‍പ്പന നടത്തിയിരുന്ന മിലന്‍ (37) എന്നയാളെയാണ് എക്സൈസ് സംഘം പിടികൂടിയത്. പ്രതി കുറച്ചുനാളുകളായി എക്സൈസ് സംഘത്തിന്റെ നിരീക്ഷണത്തിലായിരുന്നുവെന്ന് അധികൃതര്‍ അറിയിച്ചു.
കോട്ടയം എക്സൈസ് സൈബര്‍ സെല്ലിന്റെ സഹായത്തോടെ ടവര്‍ ലൊക്കേഷന്‍ കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിനൊടുവിലാണ് ഇയാളെ പിടികൂടാനായത്. ഒഡീഷയില്‍ നിന്ന് എത്തിച്ച കഞ്ചാവ് ചെറിയ പൊതികളിലാക്കി യുവാക്കള്‍ ഉള്‍പ്പെടെയുള്ളവര്‍ക്ക് ഉയര്‍ന്ന വിലയ്‌ക്ക് വില്‍പ്പന നടത്തുകയായിരുന്നു പ്രതിയുടെ രീതിയെന്ന് അന്വേഷണത്തില്‍ വ്യക്തമായി. ഇയാളുടെ പക്കല്‍ നിന്ന് മൂന്ന് കിലോ മുപ്പത് ഗ്രാം കഞ്ചാവ് എക്സൈസ് സംഘം പിടിച്ചെടുത്തു.
എക്സൈസ് ഇന്‍സ്പെക്ടര്‍ ജോര്‍ജ് ജോസഫിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. അസിസ്റ്റന്റ് എക്സൈസ് ഇന്‍സ്പെക്ടര്‍ ബിജു വര്‍ഗീസ്, പ്രിവന്റീവ് ഓഫീസര്‍മാരായ ജോബി അഗസ്റ്റിന്‍, അശോക് ബി. നായര്‍, എം.ആര്‍. രജനീഷ്, പി.പി. മഹേഷ്, വേണുഗോപാല്‍ കെ. ബാബു, നോബി ടി. സുകുമാര്‍, സിവില്‍ എക്സൈസ് ഓഫീസര്‍മാരായ മാത്യു ജോസഫ്, ഒ.എ. അരുണ്‍ലാല്‍, പി.എം. അമല്‍, ഡ്രൈവര്‍ സന്തോഷ് എന്നിവരും പരിശോധനാ സംഘത്തിലുണ്ടായിരുന്നു.
സംഭവത്തില്‍ എക്സൈസ് കൂടുതല്‍ അന്വേഷണം ആരംഭിച്ചു. കഞ്ചാവ് കടത്തിന്റെ ഉറവിടവും വിതരണ ശൃംഖലയുമായി ബന്ധപ്പെട്ട കൂടുതല്‍ വിവരങ്ങള്‍ ശേഖരിച്ചുവരികയാണെന്ന് അധികൃതര്‍ അറിയിച്ചു.
