കൊച്ചി: സംവിധായകൻ രഞ്ജിത്ത് ഒരുക്കുന്ന ‘ലോ ആൻഡ് ഓർഡർ’ (Law & Order) സെപ്റ്റംബർ 4ന് തിയേറ്ററുകളിലെത്തും. റിലീസ് തീയതി പ്രഖ്യാപിച്ചുകൊണ്ട് ചിത്രത്തിന്റെ പുതിയ പോസ്റ്ററും അണിയറപ്രവർത്തകർ പുറത്തിറക്കി.
പ്രകാശ് വർമ്മ അവതരിപ്പിക്കുന്ന പൊലീസ് ഉദ്യോഗസ്ഥനെയും അദ്ദേഹത്തിന്റെ നേതൃത്വത്തിലുള്ള യുവ പൊലീസ് സംഘത്തെയുമാണ് പുതിയ പോസ്റ്ററിൽ അവതരിപ്പിച്ചിരിക്കുന്നത്. പൂർണമായും ഒരു പൊലീസ് ആക്ഷൻ ചിത്രത്തിന്റെ സ്വഭാവം വിളിച്ചോതുന്നതാണ് പോസ്റ്റർ.
സത്യം സിനിമാസ്, മഹാ സുബൈർ മൂവി ക്ഷേത്ര എന്നീ ബാനറുകളിൽ പ്രേമചന്ദ്രൻ എ.ജി., മഹാ സുബൈർ എന്നിവർ ചേർന്നാണ് ചിത്രം നിർമ്മിക്കുന്നത്.
കൊച്ചി നഗരത്തെ പശ്ചാത്തലമാക്കി ഒരുക്കുന്ന ചിത്രം ആക്ഷനും മാസ് എന്റർടെയ്ൻമെന്റിനും ഒരുപോലെ പ്രാധാന്യം നൽകുന്ന പൊലീസ് കഥയാണ് അവതരിപ്പിക്കുന്നത്. കൊച്ചി, കണ്ണൂർ, വയനാട്, കോട്ടയം, തിരുവനന്തപുരം എന്നിവിടങ്ങളിലായി ഏകദേശം 90 ദിവസത്തിലധികം നീണ്ട ചിത്രീകരണമാണ് പൂർത്തിയാക്കിയത്.
ഫീനിക്സ് പ്രഭു, പി.സി. സ്റ്റണ്ട്സ്, മാഫിയ ശശി എന്നിവർ ചേർന്നാണ് ചിത്രത്തിലെ ആക്ഷൻ രംഗങ്ങൾ ഒരുക്കിയിരിക്കുന്നത്.
പ്രകാശ് വർമ്മയ്ക്കും അഭിരാമിക്കുമൊപ്പം ഋതു ദേവ് അയ്യപ്പൻ, ഷനൂദ് ഇബ്രാഹിം, ഡോൺ മൈക്കിൾ, സജൻ സുദർശൻ, നിജാദ് ബാബു തോമസ്, ഷെർഷ ഷെരീഫ്, റിനോഷ് ജോർജ്, അമൽ ജോസ് ആന്റണി, ബോബി കുര്യൻ, വി.കെ. പ്രകാശ്, സുരേഷ് കൃഷ്ണ, ജോയ് മാത്യു, ദേവൻ, ആനന്ദ് മൻമഥൻ, ജോണി ആന്റണി, ഭീമൻ രഘു, നന്ദു, ജെയ്സ് ജോസ്, അസിം ജമാൽ, ഗായത്രി അശോക്, അജയ് വാസുദേവ്, ശങ്കർ രാമകൃഷ്ണൻ, നന്ദൻ ഉണ്ണി, അക്ഷയ് രാധാകൃഷ്ണൻ, മോഹൻ ജോസ്, മാധുരി, സാബുമോൻ, ഗുണ്ടു കാട് സാബു, മുരുകൻ, സന്ധ്യ രാജേന്ദ്രൻ, വൈഷ്ണവി, രമാദേവി, അംബിക നായർ എന്നിവരും പ്രധാന വേഷങ്ങളിലെത്തുന്നു.
അതേസമയം, മമ്മൂട്ടി അവതരിപ്പിച്ച ജനപ്രിയ കഥാപാത്രമായ കാരിക്കാമുറി ഷൺമുഖം ചിത്രത്തിൽ അതിഥി വേഷത്തിൽ എത്തുമെന്ന തരത്തിലുള്ള റിപ്പോർട്ടുകൾ പ്രചരിക്കുന്നുണ്ടെങ്കിലും, ഇക്കാര്യത്തിൽ അണിയറ പ്രവർത്തകർ ഔദ്യോഗിക സ്ഥിരീകരണം നൽകിയിട്ടില്ല.
ഷിബു ചക്രവർത്തിയാണ് ഗാനരചന. ജോ ഡാനിയേൽ സംഗീതവും ബിജിപാൽ പശ്ചാത്തല സംഗീതവും ഒരുക്കുന്നു. പ്രശാന്ത് രവീന്ദ്രൻ ഛായാഗ്രഹണവും മനോജ് കണ്ണോത്ത് എഡിറ്റിംഗും നിർവഹിക്കുന്നു.
