മലപ്പുറം: യാത്രാ വ്ലോഗറായ യുവാവിനെ കാണാതായതായി പരാതി. മലപ്പുറം ചേലേമ്പ്ര പുല്ലിപ്പറമ്പ് പാറയിൽ സ്വദേശി ദിൽഷാദിനെയാണ് കാണാതായത്. ദിൽഷാദിന്റെ കുടുംബം തേഞ്ഞിപ്പലം പൊലീസിൽ പരാതി നൽകി.
വിവിധ രാജ്യങ്ങളിലേക്ക് യാത്രകൾ നടത്തി വീഡിയോകൾ പങ്കുവെക്കുന്ന ദിൽഷാദിന് ‘യാത്ര ടുഡേ’ എന്ന യൂട്യൂബ് ചാനലിലൂടെ നിരവധി ഫോളോവേഴ്സുണ്ട്. കഴിഞ്ഞ ആറാം തീയതിയാണ് യാത്രയുടെ ഭാഗമായി ദിൽഷാദ് വീട്ടിൽ നിന്ന് പോയത്. എന്നാൽ പിന്നീട് നാലുദിവസമായി ഇയാളെക്കുറിച്ച് യാതൊരു വിവരവും ലഭിച്ചിട്ടില്ലെന്നാണ് കുടുംബം പറയുന്നത്.
പരാതിയുടെ അടിസ്ഥാനത്തിൽ തേഞ്ഞിപ്പലം പൊലീസ് അന്വേഷണം ആരംഭിച്ചു. ദിൽഷാദിന്റെ യാത്രാ വിവരങ്ങളും ഫോൺ രേഖകളും കേന്ദ്രീകരിച്ചാണ് പ്രാഥമിക അന്വേഷണം പുരോഗമിക്കുന്നത്. യുവാവിനെക്കുറിച്ച് എന്തെങ്കിലും വിവരം ലഭിക്കുന്നവർ പൊലീസിനെ അറിയിക്കണമെന്ന് അധികൃതർ അറിയിച്ചു.