ന്യൂഡല്ഹി: 2026 വനിതാ ഏഷ്യാ കപ്പിനുള്ള ഇന്ത്യന് ടീമിനെ ബിസിസിഐ പ്രഖ്യാപിച്ചു. പരിചയസമ്പന്നയായ ഹര്മന്പ്രീത് കൗര് ടീമിനെ നയിക്കും. സ്മൃതി മന്ദാന വൈസ് ക്യാപ്റ്റനാകും. കഴിഞ്ഞ ടൂര്ണമെന്റുകളിലെ പ്രധാന താരങ്ങളെ നിലനിര്ത്തിയാണ് ഇന്ത്യ ഇത്തവണയും ടീമിനെ പ്രഖ്യാപിച്ചിരിക്കുന്നത്. ഷഫാലി വര്മ, ജെമീമ റോഡ്രിഗസ്, ഭാരതി ഫുല്മാലി, റിച്ച ഘോഷ്, ദീപ്തി ശര്മ്മ, രാധ യാദവ് എന്നിവരും ടീമില് ഇടംപിടിച്ചു. യുവതാരം പ്രേമ റാവത്ത് ടീമിലെ സ്ഥാനം നിലനിര്ത്തിയതും ശ്രദ്ധേയമായി.
അതേസമയം, കണങ്കാല് ലിഗമെന്റ് പരിക്കില് നിന്ന് പൂര്ണമായി മുക്തയാകാത്തതിനാല് ഓള്റൗണ്ടര് ശ്രേയങ്ക പാട്ടീലിന് ഏഷ്യാ കപ്പ് ടീമില് ഇടം ലഭിച്ചില്ല. ടി20 ലോകകപ്പിനിടെയുണ്ടായ പരിക്കിനെ തുടര്ന്നാണ് താരം പുറത്തായത്. സെപ്റ്റംബറില് നടക്കുന്ന ഏഷ്യന് ഗെയിംസിലൂടെ ശ്രേയങ്ക ഇന്ത്യന് ടീമിലേക്ക് തിരിച്ചെത്തുമെന്നാണ് പ്രതീക്ഷ. വനിതാ ഏഷ്യാ കപ്പിന്റെ മത്സരക്രമം ഇതുവരെ പ്രഖ്യാപിച്ചിട്ടില്ല. ഓഗസ്റ്റ് അവസാനവാരം മുതല് സെപ്റ്റംബര് പകുതിവരെ ടൂര്ണമെന്റ് നടക്കുമെന്നാണ് റിപ്പോര്ട്ടുകള്.
തുടര്ന്ന് സെപ്റ്റംബര് 17 മുതല് 22 വരെ ഏഷ്യന് ഗെയിംസും നടക്കും. പ്രതിക റാവല്, ഉമാ ചെത്രി, മിന്നു മണി, വൈഷ്ണവി ശര്മ്മ, സായലി സത്ഘറെ എന്നിവരടങ്ങുന്ന കരുത്തുറ്റ റിസര്വ് നിരയും ഇന്ത്യക്കൊപ്പമുണ്ട്. നിലവിലെ ടീമിന്റെ കരുത്ത് കണക്കിലെടുക്കുമ്പോള് ഏഷ്യാ കിരീടത്തിനുള്ള പ്രധാന ഫേവറിറ്റുകളായാണ് ഇന്ത്യന് വനിതകള് ടൂര്ണമെന്റിലിറങ്ങുന്നത്.
ഇന്ത്യന് വനിതാ ടീം:
ഹര്മന്പ്രീത് കൗര് (ക്യാപ്റ്റന്), സ്മൃതി മന്ദാന (വൈസ് ക്യാപ്റ്റന്), ഷഫാലി വര്മ, ജെമീമ റോഡ്രിഗസ്, ഭാരതി ഫുല്മാലി, റിച്ച ഘോഷ് (വിക്കറ്റ് കീപ്പര്), ജി. കാമലിനി (വിക്കറ്റ് കീപ്പര്), ദീപ്തി ശര്മ്മ, രാധ യാദവ്, പ്രേമ റാവത്ത്, അരുന്ധതി റെഡ്ഡി, ക്രാന്തി ഗൗഡ്, രേണുക സിങ്, എന്. ശ്രീ ചരാണി, നന്ദിനി ശര്മ്മ.
റിസര്വ് താരങ്ങള്: പ്രതിക റാവല്, ഉമാ ചെത്രി (വിക്കറ്റ് കീപ്പര്), വൈഷ്ണവി ശര്മ്മ, സായലി സത്ഘറെ, മിന്നു മണി.
