ആലപ്പുഴ: വാടകയ്ക്ക് വീട് നോക്കാനെന്ന വ്യാജേന എത്തിയ യുവാവ് ദമ്പതികളെ ആക്രമിച്ച് 15 പവൻ സ്വർണാഭരണങ്ങൾ കവർന്നു. ആലപ്പുഴ കൈതവന കണിയാംകുളം ജംഗ്ഷന് സമീപത്തെ സുദർശനന്റെ വീട്ടിലാണ് സംഭവം.
തിങ്കളാഴ്ച ഉച്ചയോടെയാണ് കവർച്ച നടന്നത്. വീട്ടിന്റെ മുകളിലത്തെ നില വാടകയ്ക്ക് നൽകാനിരിക്കുകയായിരുന്നു. ഈ വീട് കാണാനെന്ന പേരിലാണ് യുവാവ് എത്തിയത്. വാടക സംബന്ധിച്ച വിവരങ്ങൾ ചോദിച്ചറിയുന്നതിനിടെ ഇയാൾ അപ്രതീക്ഷിതമായി സുദർശനന്റെ കണ്ണിലേക്ക് മുളകുപൊടി എറിയുകയായിരുന്നു. സുദർശനനും ഭാര്യയും മാത്രമായിരുന്നു വീട്ടിൽ ഉണ്ടായിരുന്നത്.
ബഹളം കേട്ട് അടുക്കളയിൽ നിന്ന് ഓടിയെത്തിയ സുദർശനന്റെ ഭാര്യയെയും പ്രതി ആക്രമിച്ചു. ഇവരുടെ വായിൽ തുണി തിരുകിക്കയറ്റിയ ശേഷം വീടിന്റെ വാതിൽ അകത്തുനിന്ന് പൂട്ടി. തുടർന്ന് ഇരുവരെയും മർദിച്ച പ്രതി സ്വർണാഭരണങ്ങൾ എവിടെയാണെന്ന് ചോദിച്ചറിഞ്ഞു.
അലമാരയുടെ താക്കോൽ കൈവശപ്പെടുത്തിയ പ്രതി അലമാരയിൽ സൂക്ഷിച്ചിരുന്ന 15 പവൻ സ്വർണാഭരണങ്ങൾ കവർന്നശേഷം സ്ഥലത്തുനിന്ന് രക്ഷപ്പെടുകയായിരുന്നു. സംഭവത്തെ തുടർന്ന് ആലപ്പുഴ സൗത്ത് പൊലീസ് കേസെടുത്ത് അന്വേഷണം ആരംഭിച്ചു. സമീപ പ്രദേശങ്ങളിലെ സിസിടിവി ദൃശ്യങ്ങൾ ഉൾപ്പെടെ പരിശോധിച്ച് പ്രതിയെ കണ്ടെത്താനുള്ള ശ്രമം പുരോഗമിക്കുകയാണ്.