തിരുവനന്തപുരം/പത്തനംതിട്ട: സംസ്ഥാനത്ത് അതിശക്തമായ മഴയെ തുടര്ന്നുണ്ടായ പ്രളയക്കെടുതിയില് മരിച്ചവരുടെ എണ്ണം 16 ആയി. എട്ടുപേരെ കാണാതായതായി അധികൃതര് അറിയിച്ചു. ദുരിതബാധിത മേഖലകളില് അഗ്നിരക്ഷാസേന, എന്ഡിആര്എഫ്, മത്സ്യത്തൊഴിലാളികള് എന്നിവരുടെ നേതൃത്വത്തില് രക്ഷാപ്രവര്ത്തനം ഊര്ജിതമായി തുടരുകയാണ്. ജലനിരപ്പ് അപകടകരമായി ഉയര്ന്നതിനെ തുടര്ന്ന് മൂഴിയാര് ഉള്പ്പെടെ ചില ഡാമുകളുടെ ഷട്ടറുകളും തുറന്നു.
ഏറ്റവും കൂടുതല് നാശനഷ്ടമുണ്ടായത് പത്തനംതിട്ട, ആലപ്പുഴ ജില്ലകളിലാണ്. ശനിയാഴ്ചത്തെ മിന്നല്പ്രളയത്തിന്റെ ആഘാതം ഒഴിയും മുമ്പേ വീണ്ടും പെയ്ത കനത്ത മഴയില് പത്തനംതിട്ടയിലെ വിവിധ പ്രദേശങ്ങള് പ്രളയത്തിലായി. അപ്പര് കുട്ടനാടും ആലപ്പുഴ ജില്ലയിലെ ചെങ്ങന്നൂര്, പാണ്ടനാട്, മാന്നാര് മേഖലകളും വെള്ളത്തിനടിയിലായി.
കക്കാട്ടാറ്റിലെ ജലനിരപ്പ് ഉയര്ന്നതിനെ തുടര്ന്ന് കക്കാട് ജലവൈദ്യുത പദ്ധതിയുടെ ഭാഗമായ മൂഴിയാര് ഡാമിന്റെ രണ്ടാം നമ്പര് ഷട്ടര് 15 ശതമാനം ഉയര്ത്തി. പമ്പയുടെ പോഷകനദികളായ കല്ലാര്, അച്ചന്കോവിലാര്, മണിമലയാര് എന്നിവയിലും ജലനിരപ്പ് ഗണ്യമായി ഉയര്ന്നിട്ടുണ്ട്. രക്ഷാപ്രവര്ത്തനം ശക്തിപ്പെടുത്താന് കൊല്ലത്ത് നിന്ന് പത്ത് ബോട്ടുകളിലായി 40 മത്സ്യത്തൊഴിലാളികള് പത്തനംതിട്ടയിലെ വിവിധ മേഖലകളില് എത്തി.
അതേസമയം, കോട്ടയത്ത് മഴക്കെടുതിയില് ഒരാള് കൂടി മരിച്ചു. അയര്ക്കുന്നം ആറുമാനൂര് മൂഴിക്കല് കടവ് പുളിഞ്ചോട് ഭാഗത്ത് വെള്ളക്കെട്ടില് വീണ് ആറുമാനൂര് സ്വദേശി ജിന്റോ മാത്യു (43) മരിച്ചു. തിരുവഞ്ചൂര് പറമ്പുകര ലക്ഷംവീട്ടില് ശരണ് (30) വെള്ളത്തില് ഒഴുകിപ്പോയതായി റിപ്പോര്ട്ടുണ്ട്. ഇയാള്ക്കായി തിരച്ചില് തുടരുകയാണ്. സംസ്ഥാനത്താകെ 316 ദുരിതാശ്വാസ ക്യാമ്പുകള് പ്രവര്ത്തിക്കുന്നുണ്ട്. മഴക്കെടുതിയില് 165 ഹെക്ടറിലധികം കൃഷിയിടങ്ങള് നശിച്ചതായും 3,596 കര്ഷകരെ ഇത് നേരിട്ട് ബാധിച്ചതായും സര്ക്കാര് അറിയിച്ചു.
മഴക്കെടുതിയില് മരിച്ചവരുടെ കുടുംബങ്ങള്ക്ക് എട്ട് ലക്ഷം രൂപ വീതം ധനസഹായം നല്കുമെന്ന് മുഖ്യമന്ത്രി വി.ഡി. സതീശന് അറിയിച്ചു. ദുരിതാശ്വാസ ക്യാമ്പുകളില് നിന്ന് വീടുകളിലേക്ക് മടങ്ങുന്നവര്ക്ക് അടിയന്തര ആവശ്യങ്ങള്ക്കായി 3,800 രൂപ വീതവും നല്കും. മണ്ണിടിച്ചിലും ഉരുള്പൊട്ടലും മൂലം വീടും സ്ഥലവും പൂര്ണമായും നഷ്ടപ്പെട്ടവര്ക്കുള്ള ധനസഹായം 10 ലക്ഷത്തില് നിന്ന് 12 ലക്ഷം രൂപയായി വര്ധിപ്പിച്ചു. പൂര്ണമായും തകര്ന്ന വീടുകളുടെ പുനര്നിര്മാണത്തിനുള്ള സഹായവും നാല് ലക്ഷത്തില് നിന്ന് ആറ് ലക്ഷം രൂപയായി ഉയര്ത്തിയിട്ടുണ്ട്.
അതേസമയം, പ്രളയ സാഹചര്യത്തെ തുടര്ന്ന് ഇന്നും നാളെയുമായി നടത്താനിരുന്ന ആറന്മുള വള്ളസദ്യകള് മാറ്റിവെച്ചതായി ആറന്മുള പള്ളിയോട സേവാസംഘം സെക്രട്ടറി പ്രസാദ് ആനന്ദഭവന് അറിയിച്ചു.
