തിരുവനന്തപുരം: സംസ്ഥാനത്ത് അതിതീവ്ര മഴയ്ക്ക് സാധ്യത ശക്തമായ സാഹചര്യത്തില് പത്തനംതിട്ട, കോട്ടയം, ഇടുക്കി ജില്ലകളില് റെഡ് അലര്ട്ട് പ്രഖ്യാപിച്ച് കേന്ദ്ര കാലാവസ്ഥാ വകുപ്പ്. എറണാകുളം, ആലപ്പുഴ, കൊല്ലം, കണ്ണൂര്, കാസര്കോട് ജില്ലകളില് ഓറഞ്ച് അലര്ട്ടും, മറ്റ് എല്ലാ ജില്ലകളിലും യെല്ലോ അലര്ട്ടും തുടരുകയാണ്. 24 മണിക്കൂറിനിടെ 204.4 മില്ലിമീറ്ററിലധികം മഴ ലഭിക്കാനുള്ള സാധ്യതയെയാണ് അതിതീവ്ര മഴയായി കാലാവസ്ഥാ വകുപ്പ് വിശേഷിപ്പിക്കുന്നത്.
ശക്തമായ മഴ തുടരുന്ന സാഹചര്യത്തില് മലയോര മേഖലകളില് ഉരുള്പൊട്ടല്, മണ്ണിടിച്ചില്, മലവെള്ളപ്പാച്ചില് എന്നിവയ്ക്ക് ഉയര്ന്ന സാധ്യതയുണ്ടെന്ന് മുന്നറിയിപ്പ് നല്കിയിട്ടുണ്ട്. മലയോര പ്രദേശങ്ങളിലെയും താഴ്ന്ന മേഖലകളിലെയും അപകടസാധ്യതയുള്ള സ്ഥലങ്ങളില് താമസിക്കുന്നവര് സുരക്ഷിത കേന്ദ്രങ്ങളിലേക്കോ ദുരിതാശ്വാസ ക്യാമ്പുകളിലേക്കോ മാറാന് അധികൃതര് നിര്ദേശം നല്കി. അതിതീവ്ര മഴ മുന്നറിയിപ്പ് നിലനില്ക്കുന്നതിനാല് അത്യാവശ്യമല്ലാത്ത യാത്രകള് ഒഴിവാക്കണമെന്നും വിനോദസഞ്ചാര കേന്ദ്രങ്ങള്, ജലാശയങ്ങള്, മലയോര മേഖലകള് എന്നിവിടങ്ങളിലേക്കുള്ള സന്ദര്ശനം പൂര്ണമായും ഒഴിവാക്കണമെന്നും ദുരന്തനിവാരണ അതോറിറ്റിയും കാലാവസ്ഥാ വകുപ്പും മുന്നറിയിപ്പ് നല്കി.
കാലാവസ്ഥാ വകുപ്പിന്റെയും സംസ്ഥാന ദുരന്തനിവാരണ അതോറിറ്റിയുടെയും ഔദ്യോഗിക മുന്നറിയിപ്പുകള് തുടര്ച്ചയായി ശ്രദ്ധിക്കണമെന്നും അധികൃതര് അഭ്യര്ഥിച്ചു.
