ന്യൂഡല്‍ഹി: ജന്തര്‍ മന്തറില്‍ പ്രതിഷേധിച്ച വിദ്യാര്‍ഥികള്‍ക്കെതിരെ വെടിയുതിര്‍ത്തിട്ടില്ലെന്ന് കേന്ദ്രമന്ത്രി ജെ.പി. നദ്ദ. സംഭവത്തില്‍ വെടിവയ്പ്പിന് ഉത്തരവിട്ടിട്ടില്ലെന്നും അദ്ദേഹം വ്യക്തമാക്കി. ജന്തര്‍ മന്തറില്‍ വെടിവയ്പ്പ് നടന്നെന്ന ആരോപണത്തിലൂടെ പ്രതിപക്ഷ നേതാവ് രാഹുല്‍ ഗാന്ധി ജനങ്ങളെയും രാജ്യത്തെയും തെറ്റിദ്ധരിപ്പിക്കുകയാണെന്നും നദ്ദ ആരോപിച്ചു.
പാര്‍ലമെന്റില്‍ രാഹുല്‍ ഗാന്ധി വിഷയങ്ങള്‍ നിരന്തരം മാറ്റിക്കൊണ്ടിരിക്കുകയാണെന്നും സഭാ നടപടികള്‍ തടസപ്പെടുത്തുകയാണ് ലക്ഷ്യമെന്നും നദ്ദ പറഞ്ഞു. ആദ്യം നീറ്റ് വിഷയത്തില്‍ ചര്‍ച്ച ആവശ്യപ്പെട്ട രാഹുല്‍ ഗാന്ധി, സര്‍ക്കാര്‍ ചര്‍ച്ചയ്‌ക്ക് തയ്യാറായതോടെ രാമക്ഷേത്ര ട്രസ്റ്റും പിന്നീട് ജന്തര്‍ മന്തറിലെ സംഭവവും ഉന്നയിച്ചു.
ജന്തര്‍ മന്തര്‍ വിഷയത്തില്‍ ചര്‍ച്ചയ്‌ക്ക് സര്‍ക്കാര്‍ തയ്യാറാണെന്നും കേന്ദ്ര ആഭ്യന്തരമന്ത്രി അമിത് ഷാ എല്ലാ ചോദ്യങ്ങള്‍ക്കും പാര്‍ലമെന്റില്‍ മറുപടി നല്‍കുമെന്നും നദ്ദ പറഞ്ഞു. ”സഭ പ്രവര്‍ത്തിക്കട്ടെ; എല്ലാ വിഷയങ്ങളിലും മറുപടി നല്‍കാന്‍ സര്‍ക്കാര്‍ തയ്യാറാണ്. തെറ്റായ വിവരങ്ങള്‍ പ്രചരിപ്പിക്കരുത്. ജന്തര്‍ മന്തറില്‍ വെടിയുതിര്‍ക്കുകയോ വെടിവയ്പ്പിന് ഉത്തരവിടുകയോ ചെയ്തിട്ടില്ല” എന്നും അദ്ദേഹം വ്യക്തമാക്കി.
