ന്യൂഡല്ഹി: കീറിയും മുഷിഞ്ഞും ഉപയോഗിക്കാന് ബുദ്ധിമുട്ടുള്ള ചെറിയ മൂല്യമുള്ള കറന്സി നോട്ടുകള്ക്ക് പരിഹാരമായി പോളിമര് നോട്ടുകള് പരീക്ഷണാടിസ്ഥാനത്തില് പുറത്തിറക്കാന് കേന്ദ്രസര്ക്കാര് അനുമതി നല്കി. 10 രൂപ, 20 രൂപ വിഭാഗങ്ങളിലായി 100 കോടി പോളിമര് നോട്ടുകളാണ് ആദ്യഘട്ടത്തില് പുറത്തിറക്കുക. ഫീല്ഡ് ട്രയലിന്റെ ഫലം വിലയിരുത്തിയ ശേഷമായിരിക്കും രാജ്യവ്യാപകമായി പോളിമര് നോട്ടുകള് പുറത്തിറക്കുന്നതില് റിസര്വ് ബാങ്ക് ഓഫ് ഇന്ത്യ അന്തിമ തീരുമാനം എടുക്കുക.
പോളിമര് നോട്ടുകള് പരീക്ഷണാടിസ്ഥാനത്തില് പുറത്തിറക്കാനുള്ള നിര്ദേശം ആര്ബിഐയാണ് കേന്ദ്രസര്ക്കാരിന് സമര്പ്പിച്ചത്. 1934ലെ റിസര്വ് ബാങ്ക് ഓഫ് ഇന്ത്യ നിയമത്തിലെ 25-ാം വകുപ്പ് പ്രകാരമാണ് നോട്ടുകള് പുറത്തിറക്കുന്നത്. നിര്ദേശം സര്ക്കാര് അംഗീകരിച്ചതായി ധനമന്ത്രി നിര്മല സീതാരാമന് രാജ്യസഭയില് രേഖാമൂലം നല്കിയ മറുപടിയില് വ്യക്തമാക്കി.
നിലവിലുള്ള പേപ്പര് അധിഷ്ഠിത ബാങ്ക് നോട്ടുകള്ക്കൊപ്പം പോളിമര് നോട്ടുകളും പുറത്തിറക്കാനാണ് ആര്ബിഐയുടെ നിര്ദേശം. ഇവയുടെ സംഭരണ നടപടികള് നിലവില് പ്രാരംഭ ഘട്ടത്തിലാണ്. അതിനാല് നോട്ടുകള് പുറത്തിറക്കുന്ന കൃത്യമായ സമയപരിധിയോ ചെലവോ ഇപ്പോള് വ്യക്തമാക്കാനാകില്ലെന്നും ധനമന്ത്രി അറിയിച്ചു.
അതേസമയം, രാജ്യത്തെ ചില്ലറ പണപ്പെരുപ്പം തുടര്ച്ചയായി കുറഞ്ഞുവരുന്നതായും നിര്മല സീതാരാമന് വ്യക്തമാക്കി. 2023-24ല് 5.4 ശതമാനമായിരുന്ന ശരാശരി ചില്ലറ പണപ്പെരുപ്പം 2024-25ല് 4.6 ശതമാനമായും 2025-26ല് 2.1 ശതമാനമായും കുറഞ്ഞു. 2026-27ലെ ആദ്യ പാദത്തില് പണപ്പെരുപ്പം 3.9 ശതമാനമായി ഉയര്ന്നെങ്കിലും ആര്ബിഐയുടെ നാല് ശതമാനം ലക്ഷ്യത്തിന് താഴെയാണ്.
വിലക്കയറ്റം നിയന്ത്രിക്കുന്നതിനായി വിവിധ നികുതി ഇളവുകളും തീരുവ കുറയ്ക്കലുകളും ഉള്പ്പെടെയുള്ള നടപടികള് സര്ക്കാര് സ്വീകരിച്ചിട്ടുണ്ടെന്നും മന്ത്രി അറിയിച്ചു. ജിഎസ്ടി നിരക്കുകളിലെ യുക്തിസഹീകരണം, ചില ഭക്ഷ്യഎണ്ണങ്ങളുടെ അടിസ്ഥാന കസ്റ്റംസ് തീരുവ കുറയ്ക്കല്, പെട്രോള്-ഡീസല് കേന്ദ്ര എക്സൈസ് തീരുവയിലെ കുറവ് തുടങ്ങിയ നടപടികള് ഇതിന്റെ ഭാഗമാണ്.
വാര്ഷിക വരുമാനം 12 ലക്ഷം രൂപ വരെ ആദായനികുതിയില് നിന്ന് ഒഴിവാക്കിയതിലൂടെ വ്യക്തികളുടെ കൈവശമുള്ള വരുമാനം വര്ധിപ്പിക്കാനും ആഭ്യന്തര ഉപഭോഗത്തിന് പിന്തുണ നല്കാനും സാധിച്ചതായി കേന്ദ്രം വ്യക്തമാക്കി. 2025-26ല് പ്രതിശീര്ഷ സ്വകാര്യ അന്തിമ ഉപഭോഗ ചെലവ് 6.8 ശതമാനം വളര്ച്ച രേഖപ്പെടുത്തിയതായും മന്ത്രി പറഞ്ഞു.
