ദുബായ്: അറബിക്കടലിനെയും ഹോര്മുസ് കടലിടുക്കിനെയും ബന്ധിപ്പിക്കുന്ന തന്ത്രപ്രധാനമായ ഒമാന് ഉള്ക്കടലില് ചരക്കുകപ്പലിന് നേരെ മിസൈല് ആക്രമണം. പനാമയുടെ പതാകയേന്തിയ ‘വേല നോവ’ എന്ന കണ്ടെയ്നര് കപ്പലിന് നേരെയാണ് ആക്രമണമുണ്ടായത്. പാകിസ്ഥാന് തീരത്ത് നിന്ന് ഏകദേശം 71 നോട്ടിക്കല് മൈല് അകലെയായിരുന്നു സംഭവം. ആക്രമണം നടന്നതായി യുകെ മാരിടൈം ട്രേഡ് ഓപ്പറേഷന്സ് സ്ഥിരീകരിച്ചു. പ്രദേശത്ത് ഒരു സൈനിക വിഭാഗം കപ്പലിന് നേരെ ആക്രമണം നടത്തിയെന്നാണ് പ്രാഥമിക വിവരം.
എന്നാല് ആക്രമണത്തിന് പിന്നില് ഏത് രാജ്യത്തിനോ സംഘത്തിനോ പങ്കുണ്ടെന്ന് വ്യക്തമായിട്ടില്ല. സംഭവത്തില് അന്വേഷണം പുരോഗമിക്കുകയാണ്. മേഖലയിലൂടെ കടന്നുപോകുന്ന മറ്റ് വാണിജ്യ കപ്പലുകള് അതീവ ജാഗ്രത പാലിക്കണമെന്ന് സുരക്ഷാ ഏജന്സികള് മുന്നറിയിപ്പ് നല്കി. ആക്രമണത്തിന്റെ സ്വഭാവം ഉള്പ്പെടെയുള്ള കൂടുതല് വിവരങ്ങള് അധികൃതര് പുറത്തുവിട്ടിട്ടില്ല. പാകിസ്ഥാന്റെ തെക്കുപടിഞ്ഞാറന് തീരത്തോട് ചേര്ന്ന് സ്ഥിതി ചെയ്യുന്ന ഒമാന് ഉള്ക്കടല് അറബിക്കടലിനെയും ഹോര്മുസ് കടലിടുക്കിനെയും ബന്ധിപ്പിക്കുന്ന പ്രധാന സമുദ്രപാതയാണ്.
ഗ്വാദര് ഉള്പ്പെടെയുള്ള പാകിസ്ഥാനിലെ പ്രധാന തുറമുഖങ്ങളിലേക്കുള്ള കപ്പല് ഗതാഗതത്തിനും ഈ പാത നിര്ണായകമാണ്. അതേസമയം, മേഖലയിലെ മറ്റ് സമുദ്രപാതകളിലും സുരക്ഷാ സാഹചര്യം സങ്കീര്ണമായി തുടരുകയാണ്. ചെങ്കടലിലെ ബാബ് എല് മന്ദബ് കടലിടുക്കില് യെമന് വിമത ഗ്രൂപ്പായ ഹൂതികള് ചരക്കുകപ്പലിന് നേരെ നടത്തിയ മിസൈല് ആക്രമണത്തില് മൂന്ന് ജീവനക്കാര് കൊല്ലപ്പെട്ടതായി റിപ്പോര്ട്ടുകളുണ്ട്. രണ്ട് പാകിസ്ഥാന് പൗരന്മാരും ഒരു ഇന്തോനേഷ്യന് പൗരനുമാണ് കൊല്ലപ്പെട്ടതെന്നാണ് വിവരം.
പ്രധാന അന്താരാഷ്ട്ര കപ്പല്പാതകളില് തുടര്ച്ചയായി ഉണ്ടാകുന്ന ഇത്തരം ആക്രമണങ്ങള് ആഗോള സമുദ്രവ്യാപാരത്തിനും ചരക്ക് ഗതാഗതത്തിനും വലിയ ആശങ്കയാണ് സൃഷ്ടിക്കുന്നത്.
