തിരുവനന്തപുരം: കേരള സർവകലാശാല സംസ്കൃത വിഭാഗത്തിന്റെയും വേദാന്ത പഠനകേന്ദ്രത്തിന്റെയും ആഭിമുഖ്യത്തിൽ ‘Concepts of Women Empowerment in Sanskrit Literature for Vikasit Bharat’ എന്ന വിഷയത്തിൽ അന്താരാഷ്ട്ര സെമിനാർ സംഘടിപ്പിക്കുന്നു. ആഗസ്റ്റ് 14ന് കാര്യവട്ടം ക്യാമ്പസിലെ ഒ.എൻ.വി ബ്ലോക്കിലാണ് സെമിനാർ.
കേരള സർവകലാശാല രജിസ്ട്രാർ ആർ. രശ്മി അധ്യക്ഷത വഹിക്കും. കേരള സർവകലാശാല വൈസ് ചാൻസലർ ഡോ. മോഹനൻ കുന്നുമ്മൽ സെമിനാർ ഉദ്ഘാടനം ചെയ്യും. മുംബൈ സർവകലാശാല സംസ്കൃത വിഭാഗം മുൻ മേധാവിയും CIF-ന്റെ മുൻ ഡീനും അക്കാദമിക് ഡയറക്ടറുമായ പ്രൊഫ. ഗൗരി മാഹുലികർ മുഖ്യപ്രഭാഷണം നടത്തും.
‘വികസിത ഭാരതം’ എന്ന ആശയത്തിന്റെ പശ്ചാത്തലത്തിൽ സംസ്കൃത സാഹിത്യത്തിലെ സ്ത്രീശാക്തീകരണ സങ്കൽപ്പങ്ങൾ, സ്ത്രീകളുടെ സാമൂഹികവും സാംസ്കാരികവുമായ സ്ഥാനങ്ങൾ, സ്ത്രീശാക്തീകരണവുമായി ബന്ധപ്പെട്ട വിവിധ ആശയങ്ങൾ എന്നിവ സെമിനാറിൽ ചർച്ച ചെയ്യും.
ഡോ. എറിക് റോസൻബുഷ്, ഡോ. എം.വി. നടേശൻ, പ്രൊഫ. ശിവാനി, പ്രൊഫ. കെ. ഉണ്ണിക്കൃഷ്ണൻ, ഡോ. ഫിലിപ്പ് റുചിൻസ്കി, ഡോ. ഉമാമഹേശ്വരി തുടങ്ങിയ പ്രമുഖർ സെമിനാറിൽ പങ്കെടുക്കും.
