കോഴിക്കോട്: പേരാമ്പ്ര ചാനിയംകടവില് കാറുകളില് അപകടകരമായ രീതിയില് അഭ്യാസപ്രകടനം നടത്തിയ യുവാക്കള്ക്കെതിരെ മോട്ടോര് വാഹന വകുപ്പ് നടപടി. സംഭവത്തില് രണ്ട് കാറുകളും പിടിച്ചെടുത്തു. അനധികൃത മോഡിഫിക്കേഷനും അപകടകരമായ ഡ്രൈവിങ്ങിനും കേസെടുത്തു.
മുയിപ്പോത്ത്-ചാനിയംകടവ് റോഡില് കഴിഞ്ഞ ദിവസം ഉച്ചയ്ക്ക് ഒന്നോടെയായിരുന്നു സംഭവം. രണ്ട് കാറുകളിലെത്തിയ യുവാക്കള് റോഡില് അപകടകരമായ രീതിയില് അഭ്യാസപ്രകടനം നടത്തുകയായിരുന്നു. കാറിന്റെ ഡോറിന് മുകളിലിരുന്നും മറ്റ് വാഹനങ്ങള്ക്കും യാത്രക്കാര്ക്കും തടസ്സമുണ്ടാക്കുന്ന തരത്തിലുമായിരുന്നു ഡ്രൈവിങ്.
നിയമലംഘനം ശ്രദ്ധയില്പ്പെട്ടതിനെ തുടര്ന്നാണ് മോട്ടോര് വാഹന വകുപ്പ് വാഹനങ്ങള് പിടിച്ചെടുത്തത്. യുവാക്കളുടെ ഡ്രൈവിങ് ലൈസന്സ് സസ്പെന്ഡ് ചെയ്യുന്നതിനുള്ള നടപടികളും ആരംഭിച്ചു. ഇതിന് പുറമെ ഇരുവരെയും എടപ്പാളിലെ ഡ്രൈവര് ട്രെയിനിങ് ഇന്സ്റ്റിറ്റ്യൂട്ടില് ഒരാഴ്ചത്തെ നിര്ബന്ധിത പരിശീലനത്തിന് അയയ്ക്കും. റോഡില് മറ്റുള്ളവരുടെ ജീവനും സുരക്ഷയും അപകടത്തിലാക്കുന്ന തരത്തിലുള്ള ഡ്രൈവിങ്ങിനെതിരെ കര്ശന നടപടി തുടരുമെന്ന് മോട്ടോര് വാഹന വകുപ്പ് അറിയിച്ചു.