ന്യൂഡൽഹി: ഉപഭോക്താക്കളെ ഞെട്ടിച്ച് ഭാരതി എയർടെൽ പ്രീപെയ്ഡ് റീചാർജ് പ്ലാനുകളിൽ മാറ്റം. രാജ്യത്തുടനീളം നാല് പ്രീപെയ്ഡ് പ്ലാനുകൾ എയർടെൽ പട്ടികയിൽ നിന്ന് നീക്കം ചെയ്തു. 299, 579, 619, 649 രൂപയുടെ പ്ലാനുകളാണ് നിലവിൽ വെബ്സൈറ്റിലും എയർടെൽ താങ്ക്സ് ആപ്പിലും ലഭ്യമല്ലാത്തത്.
പ്ലാനുകൾ പിൻവലിച്ചതുമായി ബന്ധപ്പെട്ട് എയർടെൽ ഔദ്യോഗിക വിശദീകരണം ഇതുവരെ നൽകിയിട്ടില്ല. റീചാർജ് ചെയ്യാൻ ശ്രമിക്കുമ്പോഴാണ് പല ഉപഭോക്താക്കളും മാറ്റം ശ്രദ്ധിച്ചത്. വിവിധ ടെലികോം സർക്കിളുകളിൽ ആദ്യം റിപ്പോർട്ട് ചെയ്ത മാറ്റം പിന്നീട് രാജ്യത്തിന്റെ മറ്റ് ഭാഗങ്ങളിലേക്കും വ്യാപിച്ചതായാണ് റിപ്പോർട്ടുകൾ.
299 രൂപയുടെ പ്ലാനും ഇല്ല
എയർടെല്ലിന്റെ ജനപ്രിയ പ്രീപെയ്ഡ് പ്ലാനുകളിലൊന്നായിരുന്നു 299 രൂപയുടെ റീചാർജ്. 28 ദിവസത്തെ വാലിഡിറ്റിയോടൊപ്പം പ്രതിദിനം 1 ജിബി ഡാറ്റയും അൺലിമിറ്റഡ് വോയ്സ് കോളുകളും 100 എസ്എംഎസും ഈ പ്ലാനിൽ ലഭിച്ചിരുന്നു. ഇപ്പോൾ 299 രൂപയുടെ പ്ലാൻ പിൻവലിച്ചതോടെ എയർടെല്ലിന്റെ ഏറ്റവും കുറഞ്ഞ നിരക്കിലുള്ള റീചാർജ് പ്ലാൻ 349 രൂപയുടേതാണ്.
349 രൂപയ്ക്ക് ഇനി കൂടുതൽ ഡാറ്റ
299 രൂപ പ്ലാനിന് പകരമായി ലഭിക്കുന്ന 349 രൂപയുടെ റീചാർജ് 28 ദിവസത്തെ വാലിഡിറ്റിയാണ് നൽകുന്നത്. പ്രതിദിനം 2 ജിബി ഹൈസ്പീഡ് ഡാറ്റ, അൺലിമിറ്റഡ് വോയ്സ് കോളുകൾ, പ്രതിദിനം 100 എസ്എംഎസ് എന്നിവയാണ് പ്രധാന ആനുകൂല്യങ്ങൾ.
ഇതിന് പുറമെ ആറ് മാസത്തെ ആപ്പിൾ മ്യൂസിക് സബ്സ്ക്രിപ്ഷൻ, ഒരു വർഷത്തെ അഡോബി എക്സ്പ്രസ് പ്രീമിയം, എയർടെൽ ഹലോ ട്യൂൺസ് തുടങ്ങിയ അധിക ആനുകൂല്യങ്ങളും പ്ലാനിലുണ്ട്. അതേസമയം, 299 രൂപയിൽ നിന്ന് 349 രൂപയിലേക്ക് കുറഞ്ഞ റീചാർജ് നിരക്ക് ഉയർന്നത് സാധാരണ ഉപഭോക്താക്കൾക്ക് അധിക ചെലവാകും. എന്നാൽ പ്രതിദിന ഡാറ്റ 1 ജിബിയിൽ നിന്ന് 2 ജിബിയായി ഉയർന്നിട്ടുണ്ട്.
859 രൂപ പ്ലാനിനും വില കൂട്ടി
പ്രീപെയ്ഡ് പ്ലാനുകൾ പിൻവലിച്ചതിന് പിന്നാലെ മറ്റൊരു മാറ്റവും എയർടെൽ വരുത്തിയിട്ടുണ്ട്. നിലവിലുണ്ടായിരുന്ന 859 രൂപയുടെ റീചാർജ് പ്ലാനിന്റെ നിരക്ക് 899 രൂപയായി ഉയർത്തി.
പ്ലാനുകൾ പിൻവലിച്ചതിന്റെ കാരണം സംബന്ധിച്ച് എയർടെൽ ഔദ്യോഗികമായി പ്രതികരിച്ചിട്ടില്ല. കൂടുതൽ റീചാർജ് പ്ലാനുകളിൽ മാറ്റം വരുമോയെന്ന കാര്യത്തിലും വ്യക്തതയില്ല.
