ന്യൂഡല്‍ഹി: ഇന്ത്യയുടെ 80-ാം സ്വാതന്ത്ര്യദിനത്തോടനുബന്ധിച്ച് ലോകത്തിന്റെ വിവിധ ഭാഗങ്ങളില്‍നിന്ന് ലഭിച്ച ആശംസകള്‍ക്ക് പ്രധാനമന്ത്രി നരേന്ദ്ര മോദി നന്ദി അറിയിച്ചു. ഭൂട്ടാന്‍, സ്ലൊവാക്യ, മാലദ്വീപ്, ഫ്രാന്‍സ്, നേപ്പാള്‍ തുടങ്ങിയ രാജ്യങ്ങളിലെ നേതാക്കള്‍ നല്‍കിയ ആശംസകള്‍ക്ക് പ്രധാനമന്ത്രി എക്‌സിലൂടെ മറുപടി നല്‍കി. ഭൂട്ടാന്‍ പ്രധാനമന്ത്രി ഷെറിംഗ് ടോബ്‌ഗെയുടെ ആശംസകള്‍ക്ക് നന്ദി അറിയിച്ച മോദി, ശക്തമായിക്കൊണ്ടിരിക്കുന്ന ഇന്ത്യ-ഭൂട്ടാന്‍ പങ്കാളിത്തത്തെ രാജ്യം ഏറെ വിലമതിക്കുന്നതായി വ്യക്തമാക്കി.
സ്ലൊവാക് പ്രസിഡന്റ് പീറ്റര്‍ പെല്ലെഗ്രിനിയുടെ ആശംസകള്‍ക്കും പ്രധാനമന്ത്രി നന്ദി പറഞ്ഞു. ഇന്ത്യയും സ്ലൊവാക്യയും തമ്മിലുള്ള സമഗ്ര പങ്കാളിത്തം കൂടുതല്‍ ശക്തിപ്പെടുത്തുന്നതിനായി പ്രവര്‍ത്തിക്കുമെന്ന് അദ്ദേഹം അറിയിച്ചു. മാലദ്വീപ് പ്രസിഡന്റ് മുഹമ്മദ് മുയിസുവിന്റെ ആശംസകള്‍ക്ക് മറുപടിയായി ഇരു രാജ്യങ്ങളും തമ്മിലുള്ള സൗഹൃദബന്ധം കൂടുതല്‍ ശക്തമായി വളരട്ടെയെന്ന് മോദി ആശംസിച്ചു. ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന്റെ സ്വാതന്ത്ര്യദിന ആശംസകള്‍ക്കും പ്രധാനമന്ത്രി നന്ദി അറിയിച്ചു. മാക്രോണിനെ ‘സുഹൃത്തേ’ എന്ന് അഭിസംബോധന ചെയ്തായിരുന്നു മോദിയുടെ പ്രതികരണം.
നേപ്പാള്‍ പ്രധാനമന്ത്രി ബാലേന്ദ്ര ഷായുടെ ആശംസകള്‍ക്ക് നന്ദി അറിയിച്ച മോദി, ഇന്ത്യയും നേപ്പാളും തമ്മിലുള്ള പഴക്കമേറിയതും ബഹുമുഖവുമായ നാഗരിക ബന്ധം കൂടുതല്‍ ശക്തിപ്പെടുത്താന്‍ ഒരുമിച്ച് പ്രവര്‍ത്തിക്കാനുള്ള പ്രതിബദ്ധതയും വ്യക്തമാക്കി. ഇരു രാജ്യങ്ങളിലെയും ജനങ്ങളുടെ പരസ്പര അഭിവൃദ്ധിക്കും ക്ഷേമത്തിനും ബന്ധം കൂടുതല്‍ ശക്തമാക്കേണ്ടതിന്റെ പ്രാധാന്യവും അദ്ദേഹം ചൂണ്ടിക്കാട്ടി. നേപ്പാളിലെ രാഷ്‌ട്രീയ സ്വതന്ത്ര പാര്‍ട്ടി (ആര്‍എസ്പി) ചെയര്‍മാന്‍ റാബി ലാമിച്ചാനെയുടെ ആശംസകള്‍ക്കും പ്രധാനമന്ത്രി നന്ദി പറഞ്ഞു.
പരസ്പര പുരോഗതിക്കും സമൃദ്ധിക്കും വേണ്ടി ഇന്ത്യയും നേപ്പാളും തമ്മിലുള്ള സൗഹൃദബന്ധം കൂടുതല്‍ ശക്തിപ്പെടുത്താന്‍ ഇന്ത്യ പ്രതിജ്ഞാബദ്ധമാണെന്നും മോദി വ്യക്തമാക്കി. ഇന്ത്യ 80-ാം സ്വാതന്ത്ര്യദിനം ആഘോഷിക്കുന്ന വേളയിലാണ് വിവിധ രാജ്യങ്ങളിലെ നേതാക്കളില്‍നിന്നും പ്രമുഖ വ്യക്തികളില്‍നിന്നും ആശംസകള്‍ ലഭിച്ചത്.
