വെള്ളറട : രാമായണമാസാചരണത്തിന്റെയും രക്ഷാബന്ധൻ ആഘോഷത്തിന്റെയും ഭാഗമായി സാമാജിക സമരസതാ സമിതിയുടെ ആഭിമുഖ്യത്തിൽ സമാജോത്സവം സംഘടിപ്പിച്ചു . രാമായണമാസത്തിന്റെ അവസാന ദിവസമായ ആഗസ്റ്റ് 16ന് വൈകിട്ട് മൂന്ന് മണിയോടെയാണ് പരിപാടി നടന്നത്.
രാമായണമാസാചരണത്തിന്റെയും രക്ഷാബന്ധൻ ആഘോഷത്തിന്റെയും ഭാഗമായി സംഘടിപ്പിച്ച സമാജോത്സവത്തിൽ സമൂഹത്തിലെ വിവിധ വിഭാഗങ്ങളെ ഒരുമിപ്പിക്കുകയും സാമൂഹിക സമരസതയുടെ സന്ദേശം ശക്തിപ്പെടുത്തുകയുമാണ് ലക്ഷ്യമിടുന്നത്.
വെള്ളറട മേഖലയിലെ വിവിധ പ്രദേശങ്ങളിൽ നിന്നുള്ള കുടുംബങ്ങളെയും സാമൂഹിക പ്രവർത്തകരെയും പങ്കെടുപ്പിച്ചാണ് പരിപാടികൾ സംഘടിപ്പിച്ചത്. ചാക്കപ്പാറ, അയ്യാവിളാകം , കൈപ്പൻ പ്ലാവിള എന്നീ മൂന്നു വനവാസി സെറ്റിൽമെന്റുകളിലെ 160 കുടുംബങ്ങൾ സദസിൽ പങ്കെടുത്തു. ഗ്രാമോത്സവവും ഇതിന്റെ ഭാഗമായി നടത്തി .
ഓണകിറ്റ് , സ്ത്രീകൾക്കുള്ള ശുചിത്വ കിറ്റ് , മുതിർന്നവർക്കുള്ള കമ്പിളി പുതപ്പ് തുടങ്ങിയവയും പരിപാടിയുടെ ഭാഗമായി വിതരണം ചെയ്തു .
ആർഎസ്എസ് മുതിർന്ന പ്രചാരകനും സാമാജിക സമരസതയുടെ ദക്ഷിണ കേരളത്തിന്റെ സംയോജകനുമായ വി കെ വിശ്വനാഥൻ(വിശ്വൻ പാപ്പ) മുഖ്യാതിഥി ആയിരുന്നു. സമരസതാ ജില്ലാസമിതി അംഗം കല ടീച്ചർ പെൺകുട്ടികൾക്കായുള്ള ബോധവൽക്കരണ ക്ലാസ് നയിച്ചു.
സംഗീത സംവിധായകനും സമരസതാ ജില്ലാ സമിതി അംഗവും തപസ്യ ജില്ലാ ജോയിന്റ് സെക്രട്ടറിയുമായനെയ്യാറ്റിൻകര അരുണും, ജില്ലാ സമിതി അംഗം പള്ളിമംഗലം ജയകൃഷ്ണനും രാമകഥാസാരം അവതരിപ്പിച്ചു.
ജില്ലാ സംയോജക് എം. എൽ. മനോജ്, വിഭാഗ് സംയോജക് കെ. രാജശേഖരൻ, ജില്ലാ സമിതി അംഗം ആഷാരൂർ എൻ എസ് മോഹൻ കുമാർ എന്നിവരും പരിപാടിയിൽ പങ്കെടുത്തു
രാമായണമാസാചരണത്തിന്റെയും രക്ഷാബന്ധൻ ആഘോഷത്തിന്റെയും പശ്ചാത്തലത്തിൽ സംഘടിപ്പിച്ച സമാജോത്സവം സാമൂഹിക ഐക്യത്തിന്റെയും പരസ്പര സഹകരണത്തിന്റെയും സന്ദേശം ഉയർത്തിപ്പിടിക്കുന്ന പരിപാടിയായി മാറി .
