2026 ഹോക്കി ലോകകപ്പിന്റെ സ്റ്റേജ് 2-ല്‍ നെതര്‍ലന്‍ഡ്‌സിനോട് ഇന്ത്യ 1-3ന് പരാജയപ്പെട്ടു. തോല്‍വിയോടെ ഇന്ത്യ പോയിന്റില്ലാതെ തുടരുകയാണെങ്കിലും, മറ്റൊരു മത്സരത്തിലെ ഫലം അനുകൂലമായതോടെ സെമി ഫൈനല്‍ പ്രതീക്ഷകള്‍ പൂര്‍ണമായി അവസാനിച്ചിട്ടില്ല. ആദ്യ പകുതിയില്‍ ഇന്ത്യ മികച്ച പ്രതിരോധം കാഴ്ചവെച്ച് 0-0 നിലയില്‍ പിടിച്ചുനിന്നു. എന്നാല്‍ മൂന്നാം ക്വാര്‍ട്ടറില്‍ പ്രതിരോധത്തിലെ ആശയക്കുഴപ്പം മുതലെടുത്ത് ടെലിങ്കന്‍ക്യാംപ് നെതര്‍ലന്‍ഡ്‌സിന് ലീഡ് നല്‍കി.
നാലാം ക്വാര്‍ട്ടറില്‍ ഹോഡ്‌മേക്കര്‍ ലീഡ് 2-0 ആക്കി. തൊട്ടുപിന്നാലെ ഹര്‍മന്‍പ്രീത് സിങ് പെനാല്‍റ്റി കോര്‍ണറിലൂടെ ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നെങ്കിലും, നാല് മിനിറ്റിനകം തിജിസ് വാന്‍ ഡാം വീണ്ടും ഗോള്‍ നേടി ഡച്ച് വിജയം ഉറപ്പിച്ചു. അര്‍ജന്റീനയ്‌ക്കെതിരായ അവസാന മത്സരം തിങ്കളാഴ്ച ജയിക്കുക മാത്രമല്ല, വലിയ ഗോള്‍ വ്യത്യാസത്തില്‍ ജയിക്കുകയും വേണം.
അതോടൊപ്പം മറ്റൊരു മത്സരത്തില്‍ നെതര്‍ലന്‍ഡ്‌സ് ഇംഗ്ലണ്ടിനെ തോല്‍പ്പിക്കണം. ഈ രണ്ട് ഫലങ്ങളും അനുകൂലമായാല്‍ മാത്രമേ ഇന്ത്യക്ക് സെമി ഫൈനല്‍ സാധ്യത നിലനില്‍ക്കൂ. അതായത്, ഇന്ത്യയുടെ സ്ഥിതി ഇപ്പോള്‍ ”ജയിച്ചാല്‍ മാത്രം പോരാ വലിയ മാര്‍ജിനില്‍ ജയിക്കണം, കൂടാതെ മറ്റൊരു ഫലവും അനുകൂലമാകണം” എന്നതാണ്.
