ആംസ്റ്റല്‍വീന്‍: പുരുഷ ഹോക്കി ലോകകപ്പില്‍ ഇന്ത്യയുടെ സെമി പ്രതീക്ഷകള്‍ അസ്തമിച്ചു. നിര്‍ണായക മത്സരത്തില്‍ അര്‍ജന്റീനയോട് 3-5ന് തോറ്റതോടെയാണ് ഇന്ത്യ സെമി ഫൈനല്‍ കാണാതെ പുറത്തായത്. ഇതോടെ അര്‍ജന്റീനക്കെതിരായ ഇന്ത്യയുടെ തുടര്‍ച്ചയായ തോല്‍വികളുടെ എണ്ണം അഞ്ചായി. സുഖ്ജീത് സിങ് രണ്ട് ഗോളുകളും ഹാര്‍ദിക് സിങ് പെനാല്‍റ്റി സ്‌ട്രോക്കിലൂടെ ഒരു ഗോളും നേടിയെങ്കിലും അര്‍ജന്റീനയുടെ ആക്രമണത്തിന് മുന്നില്‍ ഇന്ത്യക്ക് പിടിച്ചുനില്‍ക്കാനായില്ല. മത്സരത്തിന്റെ ആദ്യ ക്വാര്‍ട്ടറില്‍ തന്നെ അര്‍ജന്റീന ഇന്ത്യയെ സമ്മര്‍ദത്തിലാക്കി. ഇന്ത്യക്ക് പ്രതിരോധത്തിലെ പിഴവുകള്‍ക്ക് കനത്ത വില നല്‍കേണ്ടിവന്നു.
മത്സരം തുടങ്ങി വെറും 40 സെക്കന്‍ഡിനുള്ളില്‍ അര്‍ജന്റീന ഇന്ത്യയുടെ പ്രതിരോധം ഭേദിച്ചു. വലതുവിങ്ങിലൂടെ നടത്തിയ മുന്നേറ്റത്തിനൊടുവില്‍ ജോക്വിന്‍ ടോസ്‌കാനിയാണ് മനോഹരമായ ഫിനിഷിലൂടെ അര്‍ജന്റീനയെ മുന്നിലെത്തിച്ചത്. തൊട്ടുപിന്നാലെ പെനാല്‍റ്റി കോര്‍ണറില്‍ നിന്ന് നിക്കോളാസ് ഡെല്‍ ടോറെയും ഗോള്‍ നേടിയതോടെ ഇന്ത്യ 0-2ന് പിന്നിലായി. പ്രതിരോധത്തില്‍ ഇന്ത്യ വരുത്തിയ ആശയക്കുഴപ്പങ്ങള്‍ അര്‍ജന്റീന തുടര്‍ച്ചയായി മുതലെടുത്തു. എന്നാല്‍ പത്താം മിനിറ്റില്‍ സുഖ്ജീത് ഇന്ത്യക്കായി ഒരു ഗോള്‍ മടക്കിയതോടെ മത്സരത്തിലേക്ക് തിരിച്ചുവരാമെന്ന പ്രതീക്ഷ ഉയര്‍ന്നു.
രണ്ടാം ക്വാര്‍ട്ടറില്‍ ഇന്ത്യ കൂടുതല്‍ പന്ത് കൈവശം വെച്ചെങ്കിലും ആക്രമണത്തില്‍ അതിന്റെ ഗുണം ലഭിച്ചില്ല. ആദ്യ പകുതിയില്‍ 54.5 ശതമാനം പൊസഷന്‍ ഇന്ത്യക്കായിരുന്നു. എന്നാല്‍ സര്‍ക്കിള്‍ എന്‍ട്രികളിലും ഷോട്ടുകളിലും അര്‍ജന്റീന വ്യക്തമായ മേല്‍ക്കൈ നേടി. ആദ്യ പകുതി അവസാനിക്കുമ്പോള്‍ സര്‍ക്കിള്‍ എന്‍ട്രികളില്‍ അര്‍ജന്റീന 10-6ന് മുന്നിലായിരുന്നു. ഷോട്ടുകള്‍ ഓണ്‍ ടാര്‍ഗറ്റിലും അര്‍ജന്റീനയ്‌ക്ക് 5-1ന്റെ മുന്‍തൂക്കമുണ്ടായിരുന്നു. മൂന്നാം ക്വാര്‍ട്ടറിലും അര്‍ജന്റീന ശക്തമായ ആക്രമണവുമായി തിരിച്ചെത്തി.
ഇടതുവശത്തുനിന്നുള്ള മികച്ച നീക്കത്തിനൊടുവില്‍ ടോമസ് ഡൊമെനെ ഇന്ത്യയുടെ വല കുലുക്കി. പിന്നാലെ ഇന്ത്യയുടെ പ്രതിരോധത്തിലെ മറ്റൊരു പിഴവ് മുതലെടുത്ത ഡൊമെനെ പെനാല്‍റ്റി സ്‌ട്രോക്കിലൂടെ തന്റെ രണ്ടാം ഗോളും നേടി. ഇതോടെ ഇന്ത്യ 1-4ന് പിന്നിലായി. തുടര്‍ന്ന് ഇന്ത്യക്ക് തുടര്‍ച്ചയായി നാല് പെനാല്‍റ്റി കോര്‍ണറുകള്‍ ലഭിച്ചെങ്കിലും അവയില്‍നിന്ന് ഗോള്‍ കണ്ടെത്താന്‍ കഴിഞ്ഞില്ല. നായകന്‍ ഹര്‍മന്‍പ്രീത് സിങ്ങിനെ അര്‍ജന്റീന പ്രതിരോധം കൃത്യമായി തടഞ്ഞതും ഇന്ത്യക്ക് തിരിച്ചടിയായി. അവസാന ക്വാര്‍ട്ടറില്‍ ഇന്ത്യ തിരിച്ചുവരാനുള്ള ശ്രമം നടത്തിയെങ്കിലും അര്‍ജന്റീന വീണ്ടും പ്രഹരിച്ചു.
മൂന്ന് ഇന്ത്യന്‍ പ്രതിരോധ താരങ്ങളെ മറികടന്ന് ലൂക്കാസ് ടോസ്‌കാനി നേടിയ ഗോളോടെ അര്‍ജന്റീന 5-1ന് മുന്നിലെത്തി. അവസാന ഘട്ടത്തില്‍ സുഖ്ജീത് ഒരു ഗോള്‍ കൂടി നേടിയതിന് പിന്നാലെ ഹാര്‍ദിക് സിങ് പെനാല്‍റ്റി സ്‌ട്രോക്കിലൂടെ മൂന്നാം ഗോള്‍ കണ്ടെത്തി. എന്നാല്‍ മത്സരം 5-3ന് അര്‍ജന്റീനയ്‌ക്ക് അനുകൂലമായി അവസാനിച്ചു. അര്‍ജന്റീനയെ രണ്ട് ഗോളിലധികം വ്യത്യാസത്തില്‍ തോല്‍പ്പിക്കുകയും ഇംഗ്ലണ്ടിനെതിരെ നെതര്‍ലാന്‍ഡ്‌സ് വിജയിക്കുകയും ചെയ്താല്‍ മാത്രമേ ഇന്ത്യക്ക് സെമി സാധ്യതയുണ്ടായിരുന്നുള്ളൂ. അര്‍ജന്റീനയോടേറ്റ തോല്‍വിയോടെ ആ പ്രതീക്ഷ അവസാനിച്ചു.
ലോകകപ്പില്‍ നിരാശപ്പെടുത്തിയ ഇന്ത്യ ഇനി ഏഴാം സ്ഥാനത്തിനായുള്ള മത്സരത്തില്‍ ബെല്‍ജിയത്തെ നേരിടും. ഓഗസ്റ്റ് 28നാണ് മത്സരം. ലോകകപ്പില്‍ മികച്ച പ്രതീക്ഷകളോടെ എത്തിയ ഇന്ത്യക്ക് മുന്നേറ്റത്തിലെ ഫിനിഷിങ് പോരായ്മകളും സമ്മര്‍ദത്തെ അതിജീവിക്കാനാകാത്തതും വീണ്ടും തിരിച്ചടിയായി. ലോകകപ്പ് ഹോക്കിയില്‍ ഇന്ത്യയുടെ 51 വര്‍ഷത്തെ കാത്തിരിപ്പ് തുടരുകയാണ്. അടുത്ത മാസം നടക്കുന്ന ഏഷ്യന്‍ ഗെയിംസില്‍ തിരിച്ചുവരാനാകും ഇന്ത്യയുടെ ശ്രമം.
