ന്യൂഡല്‍ഹി: ഇന്ത്യയും അഫ്ഗാനിസ്ഥാനുമായി സെപ്റ്റംബറില്‍ നടക്കാനിരിക്കുന്ന ടി20 പരമ്പരയുടെ കൊമേഴ്സ്യല്‍, ടിവി പ്രൊഡക്ഷന്‍ അവകാശങ്ങള്‍ പാകിസ്താന്‍ ആസ്ഥാനമായി പ്രവര്‍ത്തിക്കുന്ന ട്രാന്‍സ്ഗ്രൂപ്പ് കമ്പനിക്ക്. പരമ്പരയുടെ ആഗോള മീഡിയ റൈറ്റ്‌സ് സിന്‍ഡിക്കേഷന്‍ അവകാശമാണ് അഫ്ഗാനിസ്ഥാന്‍ ക്രിക്കറ്റ് ബോര്‍ഡ് ട്രാന്‍സ്ഗ്രൂപ്പിന് നല്‍കിയത്.
പാകിസ്താന്‍ സൂപ്പര്‍ ലീഗ്, പാകിസ്താന്‍ ക്രിക്കറ്റ് ബോര്‍ഡ് എന്നിവയുമായി സഹകരിച്ച് പ്രവര്‍ത്തിക്കുന്ന കമ്പനിയാണ് ട്രാന്‍സ്ഗ്രൂപ്പ്. ഇന്ത്യ-അഫ്ഗാനിസ്ഥാന്‍ പരമ്പരയുടെ സംപ്രേഷണവുമായി ബന്ധപ്പെട്ട അവകാശം പാകിസ്താന്‍ കമ്പനിക്ക് ലഭിച്ചതാണ് ഇപ്പോള്‍ ശ്രദ്ധ നേടുന്നത്. സെപ്റ്റംബര്‍ 13, 15, 17 തീയതികളിലാണ് മൂന്ന് മത്സരങ്ങളടങ്ങിയ ടി20 പരമ്പര നടക്കുക. അഫ്ഗാനിസ്ഥാന്‍ ക്രിക്കറ്റ് ബോര്‍ഡ് ഔദ്യോഗികമായി ആതിഥേയത്വം വഹിക്കുന്ന പരമ്പര ഇന്ത്യയിലാണ് നടക്കുന്നത്.
അഫ്ഗാനിസ്ഥാനില്‍ അന്താരാഷ്‌ട്ര മത്സരങ്ങള്‍ നടത്തുന്നതിനുള്ള സാഹചര്യം പരിമിതമായതിനാല്‍ ഹോം മത്സരങ്ങള്‍ക്കായി ഇന്ത്യയെയും യുഎഇയെയും അഫ്ഗാന്‍ ക്രിക്കറ്റ് ബോര്‍ഡ് സാധാരണയായി വേദികളാക്കാറുണ്ട്. ഇരു ടീമുകളും തമ്മിലുള്ള ആദ്യ ഔദ്യോഗിക ഉഭയകക്ഷി ടി20 പരമ്പരയെന്ന പ്രത്യേകതയും ഈ പരമ്പരയ്‌ക്കുണ്ട്. 2026 ജൂണിലാണ് അഫ്ഗാനിസ്ഥാന്‍ അവസാനമായി ഇന്ത്യയില്‍ പര്യടനം നടത്തിയത്.
ഏക ടെസ്റ്റിന് പിന്നാലെ നടന്ന മൂന്ന് മത്സര ഏകദിന പരമ്പര ഇന്ത്യ 3-0ന് സ്വന്തമാക്കിയിരുന്നു. ധര്‍മശാല, ലഖ്നൗ, ചെന്നൈ എന്നിവിടങ്ങളിലായിരുന്നു മത്സരങ്ങള്‍. ഇതിന് മുമ്പ് 2024 ജനുവരിയിലാണ് ഇന്ത്യയും അഫ്ഗാനിസ്ഥാനും തമ്മില്‍ ടി20 പരമ്പരയില്‍ ഏറ്റുമുട്ടിയത്. അന്ന് ഇന്ത്യ 3-0ന് പരമ്പര സ്വന്തമാക്കി. ബെംഗളൂരുവില്‍ നടന്ന മൂന്നാം ടി20 ഏറെ ആവേശകരമായിരുന്നു. ഇരു ടീമുകളും 212 റണ്‍സ് വീതം നേടിയതോടെ മത്സരം ടൈയായി. തുടര്‍ന്ന് നടന്ന രണ്ടാം സൂപ്പര്‍ ഓവറിലാണ് ഇന്ത്യ വിജയം സ്വന്തമാക്കിയത്.
