ഇടുക്കി: ഇടുക്കിയില്‍ കാട്ടാനയുടെ ആക്രമണത്തില്‍ തോട്ടം തൊഴിലാളിയായ 62കാരന്‍ മരിച്ചു. പൂപ്പാറയിലെ തലക്കുളം എസ്റ്റേറ്റിലാണ് സംഭവം. തമിഴ്‌നാട് ബോഡിനായ്‌ക്കന്നൂര്‍ സ്വദേശി ഒച്ച തേവറാണ് മരിച്ചത്. കാട്ടാനയുടെ ആക്രമണത്തില്‍ ഗുരുതരമായി പരിക്കേറ്റ ഒച്ച തേവറെ ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. സംഭവത്തെ തുടര്‍ന്ന് ഡിഎഫ്ഒ ഉള്‍പ്പെടെയുള്ള വനംവകുപ്പ് ഉദ്യോഗസ്ഥര്‍ സ്ഥലത്തെത്തി.
തലക്കുളം എസ്റ്റേറ്റില്‍ രാവിലെ മുതല്‍ കാട്ടാനക്കൂട്ടം തമ്പടിച്ചിരുന്നതായാണ് വിവരം. പ്രദേശത്ത് സ്ഥിരമായി കാട്ടാന ശല്യം നേരിടുന്നതായി നാട്ടുകാര്‍ പരാതിപ്പെടുന്നു. വനംവകുപ്പിന്റെ ആര്‍ആര്‍ടി സംഘം ആനകളെ വനത്തിലേക്ക് തുരത്തിയാലും ഇവ വീണ്ടും ജനവാസ മേഖലകളിലേക്ക് ഇറങ്ങുന്നതാണ് പതിവെന്ന് നാട്ടുകാര്‍ പറയുന്നു.
കാട്ടാന ശല്യം രൂക്ഷമായ സാഹചര്യത്തില്‍ പ്രദേശത്ത് കൂടുതല്‍ സുരക്ഷാ നടപടികള്‍ സ്വീകരിക്കണമെന്ന ആവശ്യവും ശക്തമാകുകയാണ്. കഴിഞ്ഞ 20 വര്‍ഷത്തിനിടെ ഇടുക്കിയില്‍ കാട്ടാന ആക്രമണത്തില്‍ 40ഓളം പേര്‍ കൊല്ലപ്പെട്ടതായാണ് കണക്ക്.
