തിരുവനന്തപുരം: നേപ്പാളിലെ ദുരന്തമേഖലയില്‍ 53 മലയാളികള്‍ ഉള്ളതായി ഇതുവരെ വിവരം ലഭിച്ചതായി നോര്‍ക്ക സിഇഒ രാജേഷ് മാധവന്‍. ഇവരെല്ലാം സുരക്ഷിതരാണെന്നും ആശങ്കപ്പെടേണ്ട സാഹചര്യമില്ലെന്നും അദ്ദേഹം അറിയിച്ചു. ഇന്നലെ വരെ നോര്‍ക്ക റൂട്ട്‌സില്‍ ലഭിച്ച 17 ഫോണ്‍ കോളുകളില്‍ നിന്നാണ് 53 മലയാളികളെക്കുറിച്ചുള്ള വിവരങ്ങള്‍ ലഭിച്ചത്. ദുരന്തമേഖലയില്‍ നെറ്റ്വര്‍ക്ക് സംവിധാനങ്ങള്‍ പൂര്‍ണമായി തകരാറിലായതിനാല്‍ ഇവരുമായി നേരിട്ട് ബന്ധപ്പെടാന്‍ സാധിച്ചിട്ടില്ല. മലയാളികളുടെ ബന്ധുക്കളാണ് നോര്‍ക്ക റൂട്ട്‌സുമായി ബന്ധപ്പെട്ട് വിവരങ്ങള്‍ കൈമാറിയത്.
53 പേരെക്കുറിച്ചുള്ള കൂടുതല്‍ കൃത്യമായ വിവരങ്ങള്‍ വൈകിട്ടോടെ ലഭിക്കുമെന്നാണ് പ്രതീക്ഷിക്കുന്നത്. ഇവരില്‍ ഭൂരിഭാഗം പേരുടെയും മൊബൈല്‍ ഫോണ്‍ നമ്പരുകള്‍ നോര്‍ക്കയ്‌ക്ക് ലഭിച്ചിട്ടുണ്ട്. ഇന്ന് ഇതുവരെ പുതിയതായി ആരും നോര്‍ക്കയെ ബന്ധപ്പെട്ടിട്ടില്ലെന്നും രാജേഷ് മാധവന്‍ പറഞ്ഞു. നേപ്പാളില്‍ കുടുങ്ങിയ മലയാളികളെ സുരക്ഷിത സ്ഥാനങ്ങളിലേക്ക് മാറ്റുന്നതിനുള്ള നടപടികള്‍ ഏകോപിപ്പിച്ചുവരികയാണ്. എല്ലാവരെയും സുരക്ഷിതമായി നാട്ടിലെത്തിക്കാന്‍ സാധിക്കുമെന്നാണ് പ്രതീക്ഷിക്കുന്നതെന്നും നോര്‍ക്ക സിഇഒ വ്യക്തമാക്കി.
മറ്റ് സംസ്ഥാനങ്ങളില്‍ നിന്നുള്ളവരും സഹായത്തിനായി നോര്‍ക്കയെ സമീപിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.
