തിരുവനന്തപുരം: വി.ഡി. സതീശന്‍ സര്‍ക്കാരിന്റെ 100 ദിവസം പൂര്‍ത്തിയായിട്ടും കേരളത്തില്‍ മാറ്റമോ വികസനമോ തൊഴിലവസരങ്ങളോ ഉറപ്പാക്കാന്‍ ഫലപ്രദമായ നടപടികളുണ്ടായിട്ടില്ലെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. സതീശന്‍ സര്‍ക്കാരിന്റെ 100 ദിവസങ്ങള്‍ ജനങ്ങള്‍ക്ക് നിരാശ മാത്രമാണ് സമ്മാനിച്ചതെന്നും അദ്ദേഹം ആരോപിച്ചു. ഹിന്ദു വിശ്വാസത്തിനെതിരെ നടക്കുന്ന അധിക്ഷേപകരമായ പരാമര്‍ശങ്ങളില്‍ സംസ്ഥാന സര്‍ക്കാര്‍ മൗനം പാലിക്കുകയാണെന്നും രാജീവ് ചന്ദ്രശേഖര്‍ കുറ്റപ്പെടുത്തി.
സണ്ണി എം. കപിക്കാട് ഉള്‍പ്പെടെയുള്ളവരുടെ വിവാദ പരാമര്‍ശങ്ങളില്‍ നിയമനടപടി സ്വീകരിക്കാതെ സര്‍ക്കാര്‍ നിഷ്‌ക്രിയമായി തുടരുന്നത് ഇരട്ടത്താപ്പിന്റെ തെളിവാണെന്നും അദ്ദേഹം പറഞ്ഞു. മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും ദേവസ്വം മന്ത്രി കെ. മുരളീധരനും ഹിന്ദു വിശ്വാസത്തിനെതിരായ പരാമര്‍ശങ്ങളില്‍ മൗനം പാലിക്കുന്നത് എന്തുകൊണ്ടാണെന്ന് രാജീവ് ചന്ദ്രശേഖര്‍ ചോദിച്ചു. നിയമം എല്ലാവര്‍ക്കും ഒരുപോലെ ബാധകമാകേണ്ടതല്ലേയെന്നും അദ്ദേഹം പ്രതികരിച്ചു.
ശബരിമലയിലെ സ്വര്‍ണക്കവര്‍ച്ച ഉള്‍പ്പെടെയുള്ള വിഷയങ്ങള്‍ ഉയര്‍ത്തിപ്പിടിച്ച് അധികാരത്തിലെത്തിയ കോണ്‍ഗ്രസ് പിന്നീട് ശബരിമലയെയും ഭഗവാന്‍ അയ്യപ്പനെയും മറന്നുവെന്നും രാജീവ് ചന്ദ്രശേഖര്‍ ആരോപിച്ചു. തങ്ങളില്‍ വിശ്വാസമര്‍പ്പിച്ച ആയിരക്കണക്കിന് ഹിന്ദു വോട്ടര്‍മാരെ കോണ്‍ഗ്രസ് വഞ്ചിച്ചെന്നും അദ്ദേഹം പറഞ്ഞു. പ്രീണനത്തിന്റെയും ഇരട്ടത്താപ്പിന്റെയും രാഷ്‌ട്രീയം മാത്രമാണ് സര്‍ക്കാരിന്റെ 100 ദിവസങ്ങളില്‍ പ്രകടമായതെന്നും സാധാരണ ജനങ്ങള്‍ക്ക് പ്രയോജനം ലഭിക്കുന്ന നടപടികള്‍ക്ക് പകരം ഭിന്നിപ്പിച്ച് ഭരിക്കുന്ന രാഷ്‌ട്രീയത്തിനാണ് സര്‍ക്കാര്‍ പ്രോത്സാഹനം നല്‍കുന്നതെന്നും രാജീവ് ചന്ദ്രശേഖര്‍ ആരോപിച്ചു.
മതവിശ്വാസങ്ങളെ അധിക്ഷേപിക്കുന്ന പരാമര്‍ശങ്ങളെ അഭിപ്രായ സ്വാതന്ത്ര്യത്തിന്റെ പേരില്‍ ന്യായീകരിക്കാനാകില്ലെന്നും അദ്ദേഹം പറഞ്ഞു. കേരളത്തിലെ ലക്ഷക്കണക്കിന് ഹിന്ദുക്കളുടെ മതവികാരങ്ങളെ വ്രണപ്പെടുത്തിയെന്നാരോപിച്ച് സണ്ണി എം. കപിക്കാടിനെതിരെ സംസ്ഥാന സര്‍ക്കാര്‍ അടിയന്തരമായി നിയമനടപടി സ്വീകരിക്കണമെന്നും രാജീവ് ചന്ദ്രശേഖര്‍ ആവശ്യപ്പെട്ടു.
