ന്യൂഡല്ഹി: ഇന്ത്യന് സൈന്യത്തിന്റെ ചരിത്രത്തില് പുതിയ അധ്യായം കുറിച്ച് മേജര് നവ്യ ശേഖാവത്ത്. രാഷ്ട്രപതി ദ്രൗപദി മുര്മുവിന്റെ Aide-de-Camp (ADC) ആയി നിയമിതയാകുന്ന ആദ്യ വനിതാ ഇന്ത്യന് ആര്മി ഓഫീസറായി നവ്യ ശേഖാവത്ത് ചരിത്രനേട്ടം സ്വന്തമാക്കി. രാജ്യത്തിന്റെ പരമോന്നത പദവിയിലുള്ള വ്യക്തിയുടെ ഔദ്യോഗിക ചുമതലകളില് നേരിട്ട് സഹകരിക്കുന്ന സുപ്രധാന ഉത്തരവാദിത്തമാണ് ADC പദവി.
കംബൈന്ഡ് ഡിഫന്സ് സര്വീസസ് (CDS) പരീക്ഷ വിജയിച്ച ശേഷമാണ് നവ്യ ശേഖാവത്ത് ഓഫീസേഴ്സ് ട്രെയിനിങ് അക്കാദമിയിലെ (OTA) കഠിനമായ പരിശീലനം പൂര്ത്തിയാക്കിയത്. തുടര്ന്ന് ഇന്ത്യന് ആര്മി സര്വീസ് കോര്പ്സില് (ASC) സേവനം ആരംഭിച്ചു. കര്ശനമായ സൈനിക പരിശീലനവും അച്ചടക്കവും നേതൃത്വപാടവവും പ്രകടിപ്പിച്ച ശേഷമാണ് രാഷ്ട്രപതിയുടെ ADC എന്ന നിര്ണായക ചുമതലയിലേക്ക് നവ്യ എത്തുന്നത്.
നവ്യ ശേഖാവത്തിന്റെ നിയമനം ഇന്ത്യന് സൈന്യത്തിലെ വനിതാ ഓഫീസര്മാരുടെ വളര്ച്ചയിലെ മറ്റൊരു സുപ്രധാന ചുവടുവയ്പ്പായാണ് വിലയിരുത്തപ്പെടുന്നത്. അച്ചടക്കവും സമര്പ്പണവും നേതൃത്വപാടവവും കൈമുതലാക്കി സൈനിക സേവനത്തില് മുന്നേറിയ നവ്യയുടെ യാത്ര നിരവധി യുവതികള്ക്ക് പ്രചോദനമാകുന്നതാണ്.
