കൊച്ചി: ബസിന് പിന്നില് ഹോണ് മുഴക്കിയതിന്റെ പേരില് കാര് യാത്രക്കാരെ വഴിയില് തടഞ്ഞുനിര്ത്തി ഭീഷണിപ്പെടുത്തിയതായി ബസ് ജീവനക്കാരനെതിരെ പരാതി. സ്വകാര്യബസ് റോഡിന് നടുവില് നിര്ത്തിയപ്പോള് പിന്നില് ഹോണ് മുഴക്കിയതിനെ തുടര്ന്നാണ് സംഭവം. കണ്ണൂര് സ്വദേശി അന്സാറാണ് കാറിലുണ്ടായിരുന്നവരെ തടഞ്ഞ് ഭീഷണിപ്പെടുത്തിയതെന്നാണ് വിവരം. അസഭ്യം പറഞ്ഞ് റോഡിന് നടുവില് കാര് തടഞ്ഞതോടെ യാത്രക്കാര് ഭയന്നുപോയി. തുടര്ന്ന് പൊലീസിനെ വിളിച്ചുവരുത്തിയ ശേഷമാണ് ഇവര് യാത്ര തുടര്ന്നത്. സംഭവത്തില് അന്സാറിനെ പൊലീസ് കസ്റ്റഡിയിലെടുത്തു.
കൊച്ചി നഗരത്തില് ബസ് ജീവനക്കാരുടെ അതിക്രമവുമായി ബന്ധപ്പെട്ട് തുടര്ച്ചയായ മൂന്നാം ദിവസമാണ് സമാന സംഭവം റിപ്പോര്ട്ട് ചെയ്യുന്നത്. മൂന്ന് ദിവസം മുമ്പ് ഇടപ്പള്ളിയില് കാര് യാത്രക്കാരെ ബസ് ജീവനക്കാര് ആക്രമിച്ച സംഭവമുണ്ടായിരുന്നു. പിന്നാലെ കഴിഞ്ഞ ദിവസം സൈഡ് കൊടുക്കാത്തത് ചോദ്യം ചെയ്ത ഓട്ടോ ഡ്രൈവറെ നോര്ത്ത് പാലത്തിന് സമീപം തടഞ്ഞുനിര്ത്തി ആക്രമിച്ചതായും പരാതി ഉയര്ന്നു. കൊച്ചി നഗരത്തിലെ സ്വകാര്യബസുകളുടെ നിയമലംഘനങ്ങളും ജീവനക്കാരുടെ പെരുമാറ്റവും നേരത്തെ ഹൈക്കോടതിയിലും ചോദ്യം ചെയ്യപ്പെട്ടിരുന്നു. ഇതിനിടെയാണ് ബസ് ജീവനക്കാരുടെ ഭീഷണിയും ആക്രമണവും സംബന്ധിച്ച പരാതികള് തുടര്ച്ചയായി ഉയരുന്നത്.
