ന്യൂഡല്ഹി: വനിതാ പ്രീമിയര് ലീഗിന്റെ അഞ്ചാം സീസണിന് 2027 ജനുവരി 14ന് തുടക്കമാകും. ഫെബ്രുവരി ഏഴിനാണ് ഫൈനല്. ടൂര്ണമെന്റിന്റെ തീയതികള് ബിസിസിഐ ഔദ്യോഗികമായി പ്രഖ്യാപിച്ചു. വനിതാ ക്രിക്കറ്റിലെ പ്രമുഖ ഫ്രാഞ്ചൈസി ടി20 ലീഗായ ഡബ്ല്യുപിഎല്ലിന്റെ അഞ്ചാം പതിപ്പിനായുള്ള ഒരുക്കങ്ങള് ഇതോടെ സജീവമായി.
ടൂര്ണമെന്റിന് മുന്നോടിയായുള്ള താരലേലം 2026 ഒക്ടോബര് 28ന് കൊച്ചിയില് നടക്കും. ലേലത്തിലൂടെ ടീമുകള്ക്ക് സ്ക്വാഡില് ആവശ്യമായ മാറ്റങ്ങള് വരുത്താനും ശക്തിപ്പെടുത്താനും അവസരം ലഭിക്കും.
ലേലത്തിന് മുന്നോടിയായി ടീമില് നിലനിര്ത്തുന്ന താരങ്ങളുടെ പട്ടിക ഓരോ ഫ്രാഞ്ചൈസിയും പ്രഖ്യാപിക്കണം. സെപ്റ്റംബര് 28 ആണ് ഇതിനുള്ള അവസാന തീയതി. അഞ്ച് ഫ്രാഞ്ചൈസികളും തങ്ങളുടെ നിലനിര്ത്തല് പട്ടിക ഇതിന് മുമ്പായി പ്രഖ്യാപിക്കണം.
ഫ്രാഞ്ചൈസികള് നിലനിര്ത്തുന്ന താരങ്ങളുടെ വിവരങ്ങള് പുറത്തുവന്നതിന് ശേഷമായിരിക്കും ലേലത്തില് പങ്കെടുക്കുന്ന താരങ്ങളുടെ പട്ടിക തയ്യാറാക്കുക. ഇതോടെ പുതിയ സീസണിലേക്കുള്ള ടീമുകളുടെ അഴിച്ചുപണി കൂടുതല് സജീവമാകും.
