കൊച്ചി: എറണാകുളം പിറവത്ത് സുഹൃത്ത് പെട്രോള് ഒഴിച്ച് തീകൊളുത്തിയ യുവാവ് മരിച്ചു. കക്കാട് പൊതുകുന്നത് അരുണ് പ്രകാശ് (31) ആണ് മരിച്ചത്. ഗുരുതരമായി പൊള്ളലേറ്റ അരുണ് കോട്ടയം ഗവ. മെഡിക്കല് കോളേജ് ആശുപത്രിയിലെ തീവ്രപരിചരണ വിഭാഗത്തില് ചികിത്സയിലിരിക്കെയാണ് മരിച്ചത്. വ്യാഴാഴ്ച പുലര്ച്ചെ പിറവം സ്നേഹഭവന് റോഡിലായിരുന്നു സംഭവം. സംഭവവുമായി ബന്ധപ്പെട്ട് അരുണിന്റെ സുഹൃത്തുക്കളായ ജിഷ്ണു, ചന്ദ്രന് എന്നിവരെ പോലീസ് കസ്റ്റഡിയിലെടുത്തിരുന്നു. ജിഷ്ണുവിന്റെ അമ്മയോട് അരുണ് ഫോണിലൂടെ മോശമായി സംസാരിച്ചെന്ന ആരോപണത്തെ തുടര്ന്നാണ് ആക്രമണമുണ്ടായതെന്നാണ് പോലീസിന്റെ പ്രാഥമിക നിഗമനം. ബുധനാഴ്ച രാത്രി വൈകി പിറവത്തെ ബാറില് ഇരിക്കുകയായിരുന്ന ജിഷ്ണു അരുണിനെ ഫോണില് വിളിച്ചിരുന്നു.
അരുണും രണ്ട് സുഹൃത്തുക്കളും പള്ളിക്കവല ഭാഗത്തുണ്ടായിരുന്നു. ബാറില് നിന്ന് പള്ളിക്കവലയിലേക്ക് പോകുന്നതിനിടെയാണ് ജിഷ്ണു പെട്രോള് വാങ്ങിയതെന്നും പോലീസ് പറയുന്നു. പള്ളിക്കവലയില് എത്തിയ സംഘം പിന്നീട് സ്നേഹഭവന് റോഡിലേക്ക് പോയി. ഇവിടെവെച്ച് അരുണും ജിഷ്ണുവും തമ്മില് വാക്കുതര്ക്കമുണ്ടായി. ഇതിനിടെ ജിഷ്ണു പെട്രോള് അരുണിന്റെ ദേഹത്തേക്ക് ഒഴിക്കുകയായിരുന്നുവെന്നാണ് അരുണിന്റെ സുഹൃത്ത് ഗീവര്ഗീസ് പോലീസിന് നല്കിയ മൊഴി. പെട്രോള് ശരീരത്തിലേക്ക് പടര്ന്നതിന് പിന്നാലെ തീപിടിക്കുകയായിരുന്നു.
തീ അണയ്ക്കാന് സുഹൃത്തുക്കള് ശ്രമിച്ചെങ്കിലും ഗുരുതരമായി പൊള്ളലേറ്റ അരുണിനെ ആശുപത്രിയില് പ്രവേശിപ്പിച്ചു. ഗീവര്ഗീസും പ്രഫുല്ലും ചേര്ന്നാണ് അരുണിനെയും ജിഷ്ണുവിനെയും ആശുപത്രിയിലെത്തിച്ചത്. അരുണിനെ ആദ്യം താലൂക്ക് ആശുപത്രിയിലും തുടര്ന്ന് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിക്കുകയായിരുന്നു. അഞ്ചുപേരും അടുത്ത സുഹൃത്തുക്കളായിരുന്നുവെന്നാണ് നാട്ടുകാരില്നിന്ന് ലഭിക്കുന്ന വിവരം. കാരവന് വാങ്ങി സിനിമാ മേഖലയിലെ ഓട്ടങ്ങളുമായി കഴിഞ്ഞിരുന്ന ജിഷ്ണു ഏതാനും മാസം മുന്പ് ഗള്ഫിലേക്ക് പോയിരുന്നു. ഇക്കഴിഞ്ഞ ഞായറാഴ്ചയാണ് രണ്ട് മക്കളോടൊപ്പം നാട്ടില് തിരിച്ചെത്തിയത്. സംഭവത്തില് പോലീസ് വിശദമായ അന്വേഷണം തുടരുകയാണ്.
