കൊച്ചി: ഇടവേളയ്ക്കുശേഷം സംസ്ഥാനത്ത് മഴ ശക്തമായതോടെ വ്യാപക നാശനഷ്ടം. മഴക്കെടുതിയില് ഒഴുക്കില്പ്പെട്ടും മണ്ണിടിഞ്ഞും ആറുപേര് മരിച്ചു. നാലുപേരെ കാണാതായി. കോട്ടയം, ഇടുക്കി, മലപ്പുറം ജില്ലകളിലാണ് പ്രധാനമായും അപകടങ്ങള് റിപ്പോര്ട്ട് ചെയ്തത്.
അതിനിടെ സംസ്ഥാനത്ത് മഴ മുന്നറിയിപ്പ് തുടരുകയാണ്. കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം ജില്ലകളില് ഒറ്റപ്പെട്ടയിടങ്ങളില് ഇടിമിന്നലോടുകൂടിയ ഇടത്തരം മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മലപ്പുറം ജില്ലയില് അടുത്ത മൂന്ന് മണിക്കൂറിലേക്ക് ഓറഞ്ച് അലര്ട്ടും പ്രഖ്യാപിച്ചിട്ടുണ്ട്.
പത്തനംതിട്ട, ആലപ്പുഴ, കോഴിക്കോട്, വയനാട്, കണ്ണൂര് ജില്ലകളില് ഒറ്റപ്പെട്ടയിടങ്ങളില് നേരിയ മഴയ്ക്കും സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു. മഴ ശക്തമായതോടെ മലയോര മേഖലകളില് പ്രത്യേക ജാഗ്രത നിര്ദേശിച്ചിട്ടുണ്ട്. മണ്ണിടിച്ചില്, മലവെള്ളപ്പാച്ചില്, വെള്ളക്കെട്ട് തുടങ്ങിയ അപകടസാധ്യതയുള്ള മേഖലകളില് ജാഗ്രത പാലിക്കണമെന്നും അധികൃതര് നിര്ദേശം നല്കി.
