നാഗ്പൂർ: ലൈംഗികാതിക്രമത്തെ തുടർന്ന് ഗർഭിണിയായ 17കാരിക്ക് 28 ആഴ്ചയും ആറ് ദിവസവും പിന്നിട്ട ഗർഭം അലസിപ്പിക്കാൻ അനുമതി നൽകി ബോംബെ ഹൈക്കോടതിയുടെ നാഗ്പൂർ ബെഞ്ച്. ഗർഭച്ഛിദ്രം വേണമോ എന്ന കാര്യത്തിൽ സ്ത്രീക്ക് സ്വന്തം ശരീരത്തെക്കുറിച്ച് നിർണായകമായ തീരുമാനമെടുക്കാനുള്ള അവകാശമുണ്ടെന്ന് നിരീക്ഷിച്ചാണ് കോടതി അനുമതി നൽകിയത്.
പിതാവ് മുഖേനയാണ് പെൺകുട്ടി കോടതിയെ സമീപിച്ചത്. സംഭവത്തിൽ നേരത്തെ എഫ്ഐആർ രജിസ്റ്റർ ചെയ്തിരുന്നു. ഗർഭകാലം 24 ആഴ്ച പിന്നിട്ടതിനാൽ സാധാരണ നിയമപരിധിക്ക് പുറത്തായ സാഹചര്യത്തിൽ മെഡിക്കൽ ടെർമിനേഷൻ ഓഫ് പ്രഗ്നൻസി ബോർഡിന്റെ പരിശോധനയും കോടതി നിർദേശിച്ചു.
സെപ്റ്റംബർ 11ന് നടത്തിയ ആദ്യ പരിശോധനയിൽ ഗർഭച്ഛിദ്രത്തിന് പെൺകുട്ടി ശാരീരികമായി അനുയോജ്യയല്ലെന്നായിരുന്നു മെഡിക്കൽ ബോർഡിന്റെ റിപ്പോർട്ട്. തുടർന്ന് അഭിഭാഷകന്റെ ആവശ്യപ്രകാരം ഒരാഴ്ച നടപടികൾ മാറ്റിവെച്ചു. സെപ്റ്റംബർ 17ന് നടത്തിയ രണ്ടാമത്തെ പരിശോധനയിൽ ഗർഭച്ഛിദ്രം സുരക്ഷിതമായി നടത്താൻ പെൺകുട്ടിക്ക് ആരോഗ്യപരമായി കഴിയുമെന്ന് ബോർഡ് സ്ഥിരീകരിച്ചു.
തുടർന്നാണ് ജസ്റ്റിസുമാരായ അനിൽ എസ്. കിലോർ, രാജ്നീഷ് ആർ. വ്യാസ് എന്നിവരടങ്ങിയ ഡിവിഷൻ ബെഞ്ച് ഗർഭച്ഛിദ്രത്തിന് അനുമതി നൽകിയത്. അനാവശ്യമായ ഗർഭധാരണം ഗർഭിണിയായ വ്യക്തിക്ക് വലിയ ശാരീരികവും മാനസികവുമായ ഭാരമാണ് സൃഷ്ടിക്കുന്നതെന്നും കോടതി നിരീക്ഷിച്ചു.
നാഗ്പൂരിലെ സർക്കാർ മെഡിക്കൽ കോളജ് ആൻഡ് ആശുപത്രിയിൽ ആവശ്യമായ സുരക്ഷാ മാനദണ്ഡങ്ങൾ പാലിച്ച് എത്രയും വേഗം നടപടിക്രമം പൂർത്തിയാക്കാനും കോടതി നിർദേശിച്ചു. കേസിൽ ക്രിമിനൽ അന്വേഷണം തുടരുന്നതിനാൽ ഗർഭസ്ഥശിശുവിന്റെ ഡിഎൻഎ സാമ്പിൾ ശേഖരിച്ച് തെളിവായി സംരക്ഷിക്കാൻ പൊലീസിനും കോടതി അനുമതി നൽകി. ഈ കേസിൽ പെൺകുട്ടിയുടെ പ്രായം, ലൈംഗികാതിക്രമത്തെ തുടർന്നുണ്ടായ ഗർഭധാരണം, മെഡിക്കൽ ബോർഡിന്റെ രണ്ടാമത്തെ റിപ്പോർട്ട് എന്നിവ പരിഗണിച്ചാണ് ഹൈക്കോടതി അനുമതി നൽകിയത്.
