ലണ്ടന്: ലണ്ടന് ഹീത്രൂവില് നിന്ന് ഡല്ഹിയിലേക്ക് പുറപ്പെട്ട ഇന്ഡിഗോ വിമാനം സാങ്കേതിക തകരാറിനെ തുടര്ന്ന് അടിയന്തരമായി തിരിച്ചിറക്കി. സെപ്റ്റംബര് 22നാണ് സംഭവം. ഇന്ഡിഗോയുടെ 6ഋ4 വിമാനമാണ് ടേക്ക് ഓഫ് ചെയ്ത് ഏകദേശം ഒരു മണിക്കൂറിന് ശേഷം ലണ്ടന് ഹീത്രൂ വിമാനത്താവളത്തിലേക്ക് തന്നെ തിരിച്ചെത്തിയത്. ടേക്ക് ഓഫിന് പിന്നാലെ സാങ്കേതിക പ്രശ്നം ശ്രദ്ധയില്പ്പെട്ടതോടെയാണ് പൈലറ്റുമാര് വിമാനം തിരിച്ചുവിടാന് തീരുമാനിച്ചത്. സ്റ്റാന്ഡേര്ഡ് ഓപ്പറേറ്റിങ് നടപടിക്രമങ്ങള് പാലിച്ചാണ് വിമാനം ലണ്ടന് ഹീത്രൂവിലേക്ക് തിരിച്ചെത്തിച്ചതെന്ന് ഇന്ഡിഗോ അറിയിച്ചു. വിമാനം സുരക്ഷിതമായി വിമാനത്താവളത്തില് ലാന്ഡ് ചെയ്തു.
വിമാനത്തിന്റെ സഞ്ചാരം നിരീക്ഷിക്കുന്ന വെബ്സൈറ്റായ ഫ്ളൈറ്റ് റഡാര് 24 പ്രകാരം, വിമാനം ഏകദേശം ഒരു മണിക്കൂറോളം ആകാശത്ത് സഞ്ചരിച്ച ശേഷമാണ് തിരിച്ചുവിട്ടത്. സംഭവത്തെക്കുറിച്ച് ഇന്ഡിഗോ പുറത്തിറക്കിയ പ്രസ്താവനയില്, ടേക്ക് ഓഫിന് പിന്നാലെ സാങ്കേതിക തകരാര് കണ്ടെത്തിയതായും തുടര്ന്ന് പൈലറ്റുമാര് ലണ്ടന് ഹീത്രൂവിലേക്ക് തിരിച്ചുവരാന് തീരുമാനിച്ചതായും വ്യക്തമാക്കി. വിമാനം നിലവില് മെയിന്റനന്സ് പരിശോധനകള്ക്ക് വിധേയമാക്കുകയാണ്. ആവശ്യമായ എല്ലാ അനുമതികളും ലഭിച്ച ശേഷം മാത്രമേ വിമാനം സര്വീസ് പുനരാരംഭിക്കുകയുള്ളൂവെന്നും ഇന്ഡിഗോ അറിയിച്ചു.
യാത്രക്കാര്ക്കുണ്ടായ അസൗകര്യത്തില് ഇന്ഡിഗോ ഖേദം പ്രകടിപ്പിച്ചു. യാത്രക്കാരുടെ ബുദ്ധിമുട്ട് കുറയ്ക്കുന്നതിനായി ഹോട്ടല് താമസ സൗകര്യം ഒരുക്കുകയും അടുത്ത ലഭ്യമായ വിമാനങ്ങളില് യാത്രക്കാരെ ഉള്പ്പെടുത്തുകയും ചെയ്തതായി എയര്ലൈന് വ്യക്തമാക്കി. യാത്രക്കാരുടെയും ജീവനക്കാരുടെയും വിമാനത്തിന്റെയും സുരക്ഷയാണ് തങ്ങളുടെ ഏറ്റവും പ്രധാന പരിഗണനയെന്നും ഇന്ഡിഗോ അറിയിച്ചു.
Don’t miss the latest breaking news and updates! Subscribe to Janam TV’s WhatsApp channel now…
