തിരുവനന്തപുരം: ശബരിമല സന്നിധാനത്തെ സ്ട്രോങ് റൂമില് സൂക്ഷിച്ചിരുന്ന 55.72 പവന് തൂക്കമുള്ള സ്വര്ണക്കിരീടം കാണാനില്ലെന്ന് കണ്ടെത്തല്. പകരം സ്ട്രോങ് റൂമില് കണ്ടെത്തിയത് അതേ രൂപത്തിലും വലുപ്പത്തിലുമുള്ള മുക്കുപണ്ടം കൊണ്ടുള്ള കിരീടം. തിരുവാഭരണങ്ങളുടെ കണക്കെടുപ്പിനിടെയാണ് ഞെട്ടിക്കുന്ന വിവരം പുറത്തുവന്നത്. മിഴ്നാട്ടില് നിന്നുള്ള അയ്യപ്പഭക്തര് 2012 ഓഗസ്റ്റ് 17ന് ശബരിമലയില് സമര്പ്പിച്ച കിരീടമാണിത്. രജിസ്റ്ററില് കിരീടം സമര്പ്പിച്ചതായി രേഖപ്പെടുത്തിയിട്ടുണ്ട്. അന്ന് കിരീടത്തിന്റെ ആകെ തൂക്കം 445.78 ഗ്രാം ആയിരുന്നു.
എന്നാല് ഇപ്പോള് സ്ട്രോങ് റൂമില് കണ്ടെത്തിയ കിരീടത്തിന് 240 ഗ്രാം മാത്രമാണ് തൂക്കം. സ്വര്ണക്കിരീടത്തിന് സമാനമായ രൂപത്തിലുള്ള മുക്കുപണ്ട കിരീടത്തിലാണ് വജ്രത്തിന് സമാനമായ വെള്ളക്കല്ലുകള് പതിച്ചിരിക്കുന്നത്. 2012 ഓഗസ്റ്റ് 17ന് ചിങ്ങപ്പുലരിയില് നടതുറന്നപ്പോഴാണ് തമിഴ്നാട്ടില് നിന്നുള്ള ചാര്ട്ടേഡ് അക്കൗണ്ടന്റുമാരായ അയ്യപ്പഭക്തര് കിരീടം നടയ്ക്കുവെച്ചത്. ഇതിനായി രസീതും നല്കിയിരുന്നു. ശ്രീകോവിലിലേക്ക് കൊണ്ടുപോയി അയ്യപ്പവിഗ്രഹത്തില് ചാര്ത്തിയ ശേഷമാണ് കിരീടം സന്നിധാനത്തെ സ്ട്രോങ് റൂമിലേക്ക് മാറ്റിയത്. എന്നാല് പിന്നീട് കിരീടത്തിന് എന്ത് സംഭവിച്ചുവെന്നത് ഇപ്പോഴും വ്യക്തമല്ല.
ശബരിമല സന്നിധാനത്തെ സ്ട്രോങ് റൂമിന് സിസിടിവി നിരീക്ഷണമില്ലെന്നാണ് വിവരം. ശബരിമലയില് ലഭിക്കുന്ന വിലപിടിപ്പുള്ള വസ്തുക്കള് താല്ക്കാലികമായി ഇവിടെ സൂക്ഷിക്കുകയാണ് പതിവ്. പിന്നീട് ഇവ ആറന്മുളയിലെ തിരുവിതാംകൂര് ദേവസ്വം ബോര്ഡിന്റെ സ്ട്രോങ് റൂമിലേക്ക് മാറ്റേണ്ടതുമാണ്. എന്നാല് 55.72 പവന് തൂക്കമുള്ള ഈ സ്വര്ണക്കിരീടം ആറന്മുളയിലേക്ക് മാറ്റിയിരുന്നില്ലെന്നാണ് വിവരം. കിരീടം എപ്പോള് കാണാതായി, മുക്കുപണ്ട കിരീടം സ്ട്രോങ് റൂമില് എത്തിയത് എങ്ങനെ തുടങ്ങിയ കാര്യങ്ങള് വിശദമായ അന്വേഷണത്തിലൂടെയേ വ്യക്തമാകൂ.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ശബരിമല സ്വര്ണക്കൊള്ളയുമായി ബന്ധപ്പെട്ട സംഭവങ്ങളുടെ പശ്ചാത്തലത്തില് ഹൈക്കോടതി നിയോഗിച്ച അമിക്കസ് ക്യൂറി ജസ്റ്റിസ് കെ.ടി. ശങ്കരന്റെ നേതൃത്വത്തില് ശബരിമലയിലെ അമൂല്യ വസ്തുക്കളുടെ കണക്കെടുപ്പ് പുരോഗമിക്കുകയാണ്. സ്ട്രോങ് റൂം തുറക്കുന്നതിനും അടയ്ക്കുന്നതിനും കര്ശനമായ നടപടിക്രമങ്ങളാണ് നിലവിലുള്ളത്. പകല്സമയത്ത് മാത്രമേ സ്ട്രോങ് റൂം തുറക്കാവൂ. താക്കോല് ചുമതലയുള്ള അഡ്മിനിസ്ട്രേറ്റീവ് ഓഫീസറുടെ കൈവശമായിരിക്കും. എക്സിക്യൂട്ടീവ് ഓഫീസറുടെ സാന്നിധ്യത്തിലായിരിക്കണം സ്ട്രോങ് റൂം തുറക്കേണ്ടത്. തുറക്കുന്നതുമുതല് അടയ്ക്കുന്നതുവരെയുള്ള നടപടികളെല്ലാം മഹസറില് രേഖപ്പെടുത്തണം. ദേവസ്വം ഗാര്ഡും സന്നിഹിതനായിരിക്കണം.
