കോട്ടയം: പൂജ, ദീപാവലി അവധിക്കാലത്തെ യാത്രാത്തിരക്ക് കണക്കിലെടുത്ത് കേരളത്തിലേക്ക് പ്രത്യേക ട്രെയിൻ സർവീസ് പ്രഖ്യാപിച്ചു. തിരുവനന്തപുരം നോർത്ത് (കൊച്ചുവേളി)–കുർള എൽ.ടി.ടി. റൂട്ടിലാണ് കോട്ടയം വഴി പ്രതിവാര പ്രത്യേക ട്രെയിൻ സർവീസ് നടത്തുന്നത്. ഒക്ടോബർ 15 മുതൽ നവംബർ 21 വരെയാണ് സർവീസ്.
നാട്ടിലേക്ക് എത്തുന്ന യാത്രക്കാർക്ക് പുറമെ പൂജ, ദീപാവലി അവധിക്കാലത്ത് കൊങ്കൺ, ഗോവ തുടങ്ങിയ വിനോദസഞ്ചാര കേന്ദ്രങ്ങളിലേക്ക് പോകുന്നവർക്കും പ്രത്യേക ട്രെയിൻ പ്രയോജനപ്പെടും.
എൽ.ടി.ടി.–തിരുവനന്തപുരം നോർത്ത് സ്പെഷ്യൽ
01463 എൽ.ടി.ടി.–തിരുവനന്തപുരം നോർത്ത് പ്രത്യേക ട്രെയിൻ ഒക്ടോബർ 15 മുതൽ നവംബർ 19 വരെ വ്യാഴാഴ്ചകളിൽ സർവീസ് നടത്തും. എൽ.ടി.ടി.യിൽനിന്ന് വൈകീട്ട് 4 മണിക്ക് പുറപ്പെടുന്ന ട്രെയിൻ അടുത്ത ദിവസം രാത്രി 11.30ന് തിരുവനന്തപുരം നോർത്തിൽ എത്തും.
01464 തിരുവനന്തപുരം നോർത്ത്–എൽ.ടി.ടി. പ്രത്യേക ട്രെയിൻ ഒക്ടോബർ 17 മുതൽ നവംബർ 21 വരെ ശനിയാഴ്ചകളിൽ സർവീസ് നടത്തും. തിരുവനന്തപുരം നോർത്തിൽനിന്ന് ഉച്ചയ്‌ക്ക് 2.15ന് പുറപ്പെടുന്ന ട്രെയിൻ അടുത്ത ദിവസം രാത്രി 11.55ന് എൽ.ടി.ടി.യിൽ എത്തും.
കൊങ്കൺ പാതയിലൂടെ കോട്ടയം ഉൾപ്പെടെയുള്ള പ്രധാന സ്റ്റേഷനുകൾ ബന്ധിപ്പിച്ചാണ് സർവീസ്.
ബെംഗളൂരു–മൈസൂരു റൂട്ടിൽ കെ.എസ്.ആർ.ടി.സി. സ്പെഷ്യൽ
പൂജ, ദീപാവലി കാലത്തെ തിരക്ക് കണക്കിലെടുത്ത് കേരള ആർ.ടി.സി.യും പ്രത്യേക സർവീസുകൾ പ്രഖ്യാപിച്ചിട്ടുണ്ട്. ഒക്ടോബർ 14 മുതൽ നവംബർ 14 വരെയാണ് അധിക സർവീസുകൾ നടത്തുന്നത്.
ബെംഗളൂരുവിൽനിന്ന് കോഴിക്കോട്, മലപ്പുറം, തൃശ്ശൂർ, നിലമ്പൂർ, പൊന്നാനി, എറണാകുളം, ചങ്ങനാശ്ശേരി, പാലാ, ആലപ്പുഴ, കൊല്ലം, പുനലൂർ, കൊട്ടാരക്കര, ചേർത്തല, ഹരിപ്പാട്, കോട്ടയം, അടൂർ, തിരുവനന്തപുരം, കണ്ണൂർ, പയ്യന്നൂർ, കാഞ്ഞങ്ങാട് തുടങ്ങിയ സ്ഥലങ്ങളിലേക്കും തിരിച്ചുമാണ് പ്രത്യേക സർവീസുകൾ.
മൈസൂരുവിൽനിന്ന് കണ്ണൂരിലേക്കും അധിക സർവീസ് ഉണ്ടായിരിക്കും.
ചില സർവീസുകൾ ഒന്നിടവിട്ട ദിവസങ്ങളിലായിരിക്കും നടത്തുക. യാത്രക്കാരുടെ തിരക്ക് അനുസരിച്ച് കൂടുതൽ പ്രത്യേക സർവീസുകൾ ആരംഭിക്കുമെന്നും കെ.എസ്.ആർ.ടി.സി. അധികൃതർ അറിയിച്ചു.
പൂജ, ദീപാവലി അവധിക്കാലത്ത് കേരളത്തിലേക്കും തിരിച്ചുമുള്ള യാത്രക്കാരുടെ എണ്ണം ഉയരുന്ന സാഹചര്യത്തിൽ റെയിൽവേയും കെ.എസ്.ആർ.ടി.സിയും പ്രഖ്യാപിച്ച അധിക സർവീസുകൾ യാത്രാത്തിരക്ക് കുറയ്‌ക്കാൻ ലക്ഷ്യമിടുന്നതാണ്.
