കൊച്ചി: പരീക്ഷാക്രമക്കേടിൽ കേരള പിഎസ്‌സിക്കെതിരെ രൂക്ഷ വിമർശനവുമായി ഹൈക്കോടതി. ആസൂത്രണ ബോർഡ് പരീക്ഷയിൽ ആകെ 58 മാർക്കിന്റെ 10 ചോദ്യങ്ങൾ ഉൾപ്പെടുത്താതിരുന്ന സംഭവത്തെ എങ്ങനെയാണ് സാധാരണ ഉദ്യോഗസ്ഥ പിഴവായി കാണാനാകുകയെന്ന് കോടതി ചോദിച്ചു.
പിഎസ്‌സിക്കെതിരെ ഉയർന്നിരിക്കുന്നത് അതീവ ഗൗരവമുള്ള ആരോപണമാണെന്ന് കോടതി നിരീക്ഷിച്ചു. കോടിക്കണക്കിന് ആളുകൾ പ്രതീക്ഷയോടെ ആശ്രയിക്കുന്ന സ്ഥാപനമാണ് പിഎസ്‌സിയെന്നും കോടതി ചൂണ്ടിക്കാട്ടി. പരീക്ഷാ നടത്തിപ്പിലെ ഇത്തരം വീഴ്ചകൾക്ക് പിന്നിൽ അഴിമതി നടന്നിട്ടുണ്ടോയെന്നതടക്കമുള്ള കാര്യങ്ങൾ പരിശോധിക്കേണ്ടതുണ്ടെന്നും കോടതി വ്യക്തമാക്കി.
“പിഎസ്‌സി നടത്തിയ കുറ്റകൃത്യങ്ങൾ അന്വേഷിക്കാൻ രാജ്യത്ത് സംവിധാനമില്ലേ?” എന്നായിരുന്നു കോടതിയുടെ ചോദ്യം. അന്വേഷണം തടസ്സപ്പെടുന്ന സാഹചര്യം അംഗീകരിക്കാനാകില്ലെന്നും കോടതി വ്യക്തമാക്കി.
അതേസമയം, 58 മാർക്കിന്റെ 10 ചോദ്യങ്ങൾ പരീക്ഷയിൽ ഉൾപ്പെടുത്താതിരുന്നത് ‘ക്ലറിക്കൽ മിസ്റ്റേക്ക്’ മാത്രമായി കണക്കാക്കാനാകില്ലെന്ന് സർക്കാർ കോടതിയിൽ വ്യക്തമാക്കി. ഇത്രയും വലിയ വീഴ്ചയെ അത്തരത്തിൽ ലഘൂകരിക്കുന്നത് യുക്തിസഹമല്ലെന്നും സർക്കാർ വാദിച്ചു. സംഭവത്തിന് പിന്നിലെ യഥാർഥ വസ്തുതകൾ പുറത്തുകൊണ്ടുവരാൻ വിശദമായ അന്വേഷണം ആവശ്യമാണ്. പിഎസ്‌സി ചെയർമാൻ ഉൾപ്പെടെയുള്ളവർ അന്വേഷണ സംഘത്തോട് സഹകരിക്കുന്നില്ല. പിഎസ്‌സിക്കെതിരെ 180ലേറെ പരാതികൾ ലഭിച്ചിട്ടുണ്ടെന്നും സർക്കാർ വ്യക്തമാക്കി.
അന്വേഷണവുമായി സഹകരിക്കാത്തതിന്റെ കാരണം എന്താണെന്ന് പിഎസ്‌സിയോട് കോടതി ചോദിച്ചു. അന്വേഷണ സംഘത്തിന്റെ നോട്ടീസിന് ശേഷവും ഹാജരാകാതിരുന്നാൽ സർക്കാർ തുടർനടപടി സ്വീകരിക്കണമെന്നും കോടതി നിർദേശിച്ചു.
അന്വേഷണ സംഘത്തിന് മുന്നിൽ ഹാജരായി ആവശ്യമായ വിവരങ്ങൾ നൽകേണ്ടത് പിഎസ്‌സി അധികൃതരുടെ ധാർമ്മിക ഉത്തരവാദിത്തമാണെന്നും കോടതി നിരീക്ഷിച്ചു. നോട്ടീസ് നൽകിയിട്ടും ഹാജരാകാത്ത പക്ഷം കടുത്ത നടപടികളിലേക്ക് നീങ്ങേണ്ടി വരുമെന്നും സർക്കാരിന് കോടതി നിർദേശം നൽകി.
യുവതലമുറയുടെ പ്രതീക്ഷകൾ സംരക്ഷിക്കപ്പെടേണ്ടത് അനിവാര്യമാണെന്നും പിഎസ്‌സി പോലൊരു സംവിധാനത്തിന്റെ വിശ്വാസ്യതയ്‌ക്ക് കോട്ടം തട്ടുന്ന നടപടികൾ ഗൗരവമായി കാണണമെന്നും കോടതി വ്യക്തമാക്കി. ക്രൈംബ്രാഞ്ച് അന്വേഷണം ചോദ്യം ചെയ്ത് സമർപ്പിച്ച റിട്ട് ഹർജിയിലാണ് ഹൈക്കോടതിയുടെ സുപ്രധാന നിരീക്ഷണങ്ങൾ.
