പിണറായിയുടെ അപ്പീലിനെ സര്‍ക്കാര്‍ അനുകൂലിച്ചത് എന്തിന്? കേസില്‍ എല്‍ഡിഎഫ്-യുഡിഎഫ് ഒത്തുകളി; പൊതുജനങ്ങളോട് വിശദീകരിക്കണമെന്ന് കെ. സുരേന്ദ്രന്‍

തിരുവനന്തപുരം: മാസപ്പടി കേസില്‍ മുഖ്യമന്ത്രി പിണറായി വിജയന്റെ വാദങ്ങളെ പിന്തുണയ്‌ക്കുന്ന നിലപാട് സംസ്ഥാന സര്‍ക്കാര്‍ ഹൈക്കോടതിയില്‍ സ്വീകരിച്ചത് എല്‍ഡിഎഫ്-യുഡിഎഫ് ഒത്തുകളിയുടെ ഭാഗമാണെന്ന് ബിജെപി ദേശീയ സെക്രട്ടറി കെ. സുരേന്ദ്രന്‍ ആരോപിച്ചു. പ്രതിപക്ഷത്തിരിക്കെ ഉന്നയിച്ച ആരോപണങ്ങള്‍ മറന്നുകൊണ്ടാണ് മുഖ്യമന്ത്രിയും ആഭ്യന്തരമന്ത്രിയും ഇപ്പോള്‍ നിലപാട് സ്വീകരിക്കുന്നതെന്നും അദ്ദേഹം വിമര്‍ശിച്ചു. പ്രതിപക്ഷ നേതാവ് വി.ഡി. സതീശന്‍ ഒത്തുകളി രാഷ്‌ട്രീയത്തിന്റെ പ്രതീകമായി മാറിയിരിക്കുകയാണെന്ന് സുരേന്ദ്രന്‍ പറഞ്ഞു. യുഡിഎഫിന് വോട്ട് ചെയ്തവരെ നേതൃത്വം വഞ്ചിച്ചു. രാഹുല്‍ ഗാന്ധിയുടെ നിര്‍ദേശപ്രകാരമാണോ സതീശനും രമേശ് ചെന്നിത്തലയും പിണറായി വിജയനെ രക്ഷിക്കാന്‍ ശ്രമിക്കുന്നതെന്ന സംശയം ജനങ്ങള്‍ക്കുണ്ടെന്നും അദ്ദേഹം ആരോപിച്ചു.

സിഎംആര്‍എല്‍-എക്‌സാലോജിക് സാമ്പത്തിക ഇടപാടുമായി ബന്ധപ്പെട്ട ആരോപണങ്ങളില്‍ എന്‍ഫോഴ്‌സ്‌മെന്റ് ഡയറക്ടറേറ്റ് കൈമാറിയ വിവരങ്ങളുടെ അടിസ്ഥാനത്തില്‍ എഫ്‌ഐആര്‍ രജിസ്റ്റര്‍ ചെയ്യണമെന്ന ഹൈക്കോടതി സിംഗിള്‍ ബെഞ്ച് ഉത്തരവിനെതിരായ അപ്പീലുകളിലാണ് സംസ്ഥാന സര്‍ക്കാരിന്റെ നിലപാട് വിവാദമായത്. കേസെടുക്കാന്‍ മതിയായ തെളിവുകളില്ലെന്ന വാദം ഉന്നയിച്ച് പിണറായി വിജയന്റെ അപ്പീലിനെ സര്‍ക്കാര്‍ അനുകൂലിച്ചത് ഗൗരവകരമാണെന്ന് സുരേന്ദ്രന്‍ പറഞ്ഞു. ഇത്തരമൊരു നിലപാട് സ്വീകരിക്കാനുള്ള കാരണം സംസ്ഥാന സര്‍ക്കാര്‍ പൊതുജനങ്ങളോട് വിശദീകരിക്കണം.

സാധാരണ പൗരന്മാര്‍ക്കെതിരായ ആരോപണങ്ങളിലും അധികാരത്തിലിരുന്നവര്‍ക്കെതിരായ ആരോപണങ്ങളിലും സര്‍ക്കാര്‍ വ്യത്യസ്ത സമീപനം സ്വീകരിക്കരുതെന്നും അദ്ദേഹം ആവശ്യപ്പെട്ടു. നിയമം എല്ലാവര്‍ക്കും ഒരുപോലെ ബാധകമാകണം. മാസപ്പടി ഇടപാടുമായി ബന്ധപ്പെട്ട ആരോപണങ്ങള്‍ രാഷ്‌ട്രീയ ആരോപണങ്ങളില്‍ ഒതുങ്ങാതെ സ്വതന്ത്രവും സുതാര്യവുമായ അന്വേഷണത്തിലൂടെ പരിശോധിക്കണം. സാമ്പത്തിക ഇടപാടുകളുടെ യഥാര്‍ഥ സ്വഭാവം പുറത്തുകൊണ്ടുവരുകയും നിയമപരമായ ഉത്തരവാദിത്വം ഉറപ്പാക്കുകയും വേണമെന്നും സുരേന്ദ്രന്‍ പറഞ്ഞു. അതേസമയം, എഫ്‌ഐആര്‍ രജിസ്റ്റര്‍ ചെയ്യാനുള്ള സിംഗിള്‍ ബെഞ്ച് ഉത്തരവിനെതിരെ പിണറായി വിജയനും മറ്റുള്ളവരും നല്‍കിയ അപ്പീലുകള്‍ ഹൈക്കോടതി ഡിവിഷന്‍ ബെഞ്ച് തള്ളിയതിനെ സുരേന്ദ്രന്‍ സ്വാഗതം ചെയ്തു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

കേസിലെ തുടര്‍നടപടികള്‍ നിയമാനുസൃതമായും സുതാര്യമായും മുന്നോട്ടുപോകണമെന്നും അദ്ദേഹം ആവശ്യപ്പെട്ടു.