തിരുവനന്തപുരം: അര്‍ജന്റീന ഫുട്‌ബോള്‍ ടീമിനെയും ലയണല്‍ മെസിയെയും കേരളത്തിലെത്തിക്കാനുള്ള നീക്കവുമായി ബന്ധപ്പെട്ട സ്‌പോണ്‍സര്‍ഷിപ്പ് വിവാദത്തില്‍ മുന്‍ കായികമന്ത്രി വി. അബ്ദുറഹിമാനെതിരെ അഴിമതി നിരോധന നിയമപ്രകാരം കേസെടുക്കാന്‍ ഗവര്‍ണറുടെ അനുമതി തേടി സര്‍ക്കാര്‍. ഇതുസംബന്ധിച്ച അപേക്ഷ ഗവര്‍ണര്‍ക്ക് കൈമാറിയതായാണ് റിപ്പോര്‍ട്ട്. മന്ത്രിയായിരിക്കെ നടത്തിയതായി ആരോപിക്കപ്പെടുന്ന ക്രമക്കേടുകളില്‍ അന്വേഷണം നടത്താന്‍ ഗവര്‍ണറുടെ അനുമതി ആവശ്യമാണെന്ന നിയമവകുപ്പിന്റെ അഭിപ്രായത്തെ തുടര്‍ന്നാണ് നടപടി. മുന്‍ മന്ത്രിക്കും ഉദ്യോഗസ്ഥര്‍ക്കുമെതിരെ അന്വേഷണം നടത്താന്‍ ആഭ്യന്തരവകുപ്പിന് നേരിട്ട് ഉത്തരവിടാനാകുമെന്ന നിയമോപദേശവും സര്‍ക്കാരിന് ലഭിച്ചിരുന്നതായി റിപ്പോര്‍ട്ടിലുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
സ്‌പോണ്‍സര്‍ഷിപ്പ് വിവാദം അന്വേഷിച്ച എഡിജിപി പി. വിജയന്റെ നേതൃത്വത്തിലുള്ള പ്രത്യേക അന്വേഷണസംഘം പ്രാഥമിക റിപ്പോര്‍ട്ട് ഡിജിപിക്ക് സമര്‍പ്പിച്ചിരുന്നു. ഈ മാസം അഞ്ചിന് റിപ്പോര്‍ട്ട് സര്‍ക്കാരിന് കൈമാറിയതായാണ് വിവരം. മുന്‍ കായികമന്ത്രി വി. അബ്ദുറഹിമാന്‍ ഉള്‍പ്പെടെ അഞ്ചുപേര്‍ക്കെതിരെ അഴിമതി നിരോധന നിയമപ്രകാരം കേസെടുക്കണമെന്നാണ് അന്വേഷണസംഘത്തിന്റെ പ്രധാന ശുപാര്‍ശ. അബ്ദുറഹിമാന്‍ ഔദ്യോഗിക പദവി ദുരുപയോഗം ചെയ്ത് സ്‌പോണ്‍സറായ സ്വകാര്യ സ്ഥാപനത്തിന് സാമ്പത്തിക നേട്ടമുണ്ടാക്കാന്‍ വഴിവിട്ട ഇടപെടലുകള്‍ നടത്തിയെന്നാണ് അന്വേഷണസംഘത്തിന്റെ കണ്ടെത്തലെന്ന് റിപ്പോര്‍ട്ടില്‍ പറയുന്നു. ഇടപാടുമായി ബന്ധപ്പെട്ട് സര്‍ക്കാര്‍ രേഖകള്‍ ദുരുപയോഗം ചെയ്‌തെന്നും സംസ്ഥാനത്തിന് കോടികളുടെ സാമ്പത്തിക നഷ്ടമുണ്ടായെന്നും അന്വേഷണസംഘം വിലയിരുത്തിയതായി റിപ്പോര്‍ട്ടിലുണ്ട്.
