കൊച്ചി: ബിരുദ പരീക്ഷ പാസാകാത്ത രണ്ട് വിദ്യാർഥികൾക്ക് കാലടി ശ്രീശങ്കരാചാര്യ സംസ്കൃത സർവകലാശാലയിൽ ബിരുദാനന്തര ബിരുദ പ്രവേശനം നൽകിയെന്ന പരാതിയിൽ സർവകലാശാലയോട് വിശദീകരണം തേടി സംസ്ഥാന ഓഡിറ്റ് വകുപ്പ്. എംഎഫ്എ പാസായ കലേഷ് എ, എംഎ സംസ്കൃത സാഹിത്യം പാസായ നിവേദിത രാജ് എന്നിവരുടെ പ്രവേശനവുമായി ബന്ധപ്പെട്ടാണ് ഓഡിറ്റ് വിഭാഗം വിശദീകരണം ആവശ്യപ്പെട്ടിരിക്കുന്നത്.
ബിരുദ പരീക്ഷയിൽ വിജയിക്കാത്ത വിദ്യാർഥികൾക്ക് ഏത് മാനദണ്ഡത്തിന്റെ അടിസ്ഥാനത്തിലാണ് പിജി പ്രവേശനം നൽകിയതെന്നാണ് ഓഡിറ്റ് വിഭാഗം പ്രധാനമായും ഉന്നയിക്കുന്ന ചോദ്യം. സാധാരണ ബിരുദം പൂർത്തിയാക്കിയ ശേഷമാണ് പിജിക്ക് പ്രവേശനം ലഭിക്കേണ്ടത്. എന്നാൽ ഈ രണ്ട് വിദ്യാർഥികളും ബിരുദം പാസാകാതെയാണ് പിജി പഠനം പൂർത്തിയാക്കി വിജയിച്ചതെന്നാണ് കണ്ടെത്തൽ.
കലേഷിന്റെ പ്രവേശനത്തിൽ ക്രമക്കേട് ആരോപണം
2001ൽ കാലടി സർവകലാശാലയിൽ ബിഎഫ്എ പെയിന്റിങ് കോഴ്സിന് പ്രവേശനം നേടിയ വ്യക്തിയാണ് കലേഷ്. കോഴ്സിൽ പ്രവേശനം നേടിയ 22 പേരിൽ 14 പേർ മാത്രമാണ് വിജയിച്ചത്. വിജയിക്കാത്തവരിൽ ഒരാളായിരുന്നു കലേഷെന്നും ഓഡിറ്റ് പരിശോധനയിൽ കണ്ടെത്തിയിട്ടുണ്ട്.
എന്നാൽ 2021ൽ ഇതേ സർവകലാശാലയിൽ എംഎഫ്എയ്ക്ക് പ്രവേശനം നേടുകയും 2023ൽ കോഴ്സ് വിജയകരമായി പൂർത്തിയാക്കുകയും ചെയ്തു. മറ്റൊരു ജോലി ആവശ്യത്തിനായി ബിരുദ സർട്ടിഫിക്കറ്റ് ആവശ്യപ്പെട്ട് സർവകലാശാലയെ സമീപിച്ചപ്പോഴാണ് ബിരുദം പാസായിട്ടില്ലെന്ന വിവരം പുറത്തുവന്നതെന്നാണ് റിപ്പോർട്ട്.
വിഷയത്തിൽ അന്വേഷണം നടത്താൻ ഡോ. കെ.എം. സംഘമേശൻ അധ്യക്ഷനായി സർവകലാശാല കമ്മിറ്റി രൂപീകരിച്ചിരുന്നു. ഈ വർഷം ഫെബ്രുവരിയിൽ അന്വേഷണവുമായി ബന്ധപ്പെട്ട കത്ത് സർവകലാശാലയ്ക്കും ഉന്നതവിദ്യാഭ്യാസ വകുപ്പിനും ലഭിച്ചെങ്കിലും ഇതുവരെ മറുപടി ലഭിച്ചിട്ടില്ലെന്നാണ് പരാതിയിൽ പറയുന്നത്.
നിവേദിത രാജിന് പിജി പ്രവേശനം ലഭിച്ചത് ബിരുദം പാസാകാതെ
രണ്ടാമത്തെ വിദ്യാർഥിനിയായ നിവേദിത രാജ് 2014ൽ സർവകലാശാലയുടെ തുറവൂർ പ്രാദേശിക കേന്ദ്രത്തിൽ ബിഎ സംസ്കൃത സാഹിത്യത്തിന് പ്രവേശനം നേടിയിരുന്നു. 2017ൽ വന്ന ബിരുദ പരീക്ഷാഫലത്തിൽ വിജയിക്കാൻ ആവശ്യമായ മാർക്ക് ലഭിച്ചിരുന്നില്ലെന്നാണ് ഓഡിറ്റ് കണ്ടെത്തൽ.
എന്നാൽ 2017ൽ തന്നെ എംഎയ്ക്ക് പ്രവേശനം നേടുകയും 2019ൽ ബിരുദാനന്തര ബിരുദം വിജയകരമായി പൂർത്തിയാക്കുകയും ചെയ്തു. ബിരുദം വിജയിക്കാത്ത വിദ്യാർഥികൾക്ക് തുടർപഠനത്തിന് പ്രവേശനം നൽകിയതിന്റെ മാനദണ്ഡങ്ങൾ വ്യക്തമാക്കണമെന്നാണ് സംസ്ഥാന ഓഡിറ്റ് വിഭാഗത്തിന്റെ ആവശ്യം. പ്രവേശന നടപടികളിൽ ഉദ്യോഗസ്ഥതലത്തിൽ വീഴ്ചയുണ്ടായോ, മറ്റ് ഇടപെടലുകൾ ഉണ്ടായിരുന്നോ തുടങ്ങിയ കാര്യങ്ങളും പരിശോധിക്കേണ്ടതുണ്ട്. സംഭവത്തിൽ സർവകലാശാലയുടെ വിശദീകരണവും തുടർനടപടികളും നിർണായകമാകും.















