ന്യൂഡല്ഹി: സംരക്ഷിത ഇനം തത്തകളെ അനധികൃതമായി കടത്തുകയും വില്പ്പനയ്ക്ക് എത്തിക്കുകയും ചെയ്ത അന്തര്സംസ്ഥാന സംഘം പിടിയില്. ഉത്തര്പ്രദേശിലെ വാരണാസിയില് വനംവകുപ്പും സ്പെഷ്യല് ടാസ്ക് ഫോഴ്സും സംയുക്തമായി നടത്തിയ പരിശോധനയിലാണ് ബിഹാര് സ്വദേശികളായ മൂന്ന് പേര് അറസ്റ്റിലായത്. ഇവരില് നിന്ന് 650 ജീവനുള്ള തത്തകളെ കണ്ടെത്തി. മുഹമ്മദ് നസീര് (19), അഫ്താബ് (25), മുഹമ്മദ് ഷമീം (53) എന്നിവരാണ് പിടിയിലായത്. വാരണാസി സര്ക്കിളിലെ ഡിവിഷണല് ഫോറസ്റ്റ് ഓഫീസറുടെ നേതൃത്വത്തിലുള്ള സംഘവും സ്പെഷ്യല് ടാസ്ക് ഫോഴ്സും ചേര്ന്നായിരുന്നു പരിശോധന.
സംശയത്തെ തുടര്ന്ന് പിക്കപ്പ് വാഹനം തടഞ്ഞുനിര്ത്തി നടത്തിയ പരിശോധനയിലാണ് പക്ഷികളെ കണ്ടെത്തിയത്. വാഹനത്തിലുണ്ടായിരുന്ന ഏഴ് ഇരുമ്പ് കൂടുകളിലും രണ്ട് ബാഗുകളിലുമായാണ് 650 തത്തകളെ ഒളിപ്പിച്ചിരുന്നത്. ഇതില് 60 അലക്സാണ്ട്രിയന് പാരക്കീറ്റുകളും 590 മറ്റ് ഇനം തത്തകളും ഉള്പ്പെടുന്നു. ചോദ്യം ചെയ്യലില് മിര്സാപൂര്, ചന്ദൗലി വനമേഖലകളിലെ വേട്ടക്കാരില് നിന്നാണ് പക്ഷികളെ വാങ്ങിയതെന്ന് പ്രതികള് വെളിപ്പെടുത്തിയതായി വനംവകുപ്പ് അറിയിച്ചു. വിവിധ നഗരങ്ങളിലേക്ക് തത്തകളെ എത്തിച്ച് വില്ക്കാനായിരുന്നു സംഘത്തിന്റെ പദ്ധതിയെന്നും അന്വേഷണത്തില് വ്യക്തമായി.
വാരണാസി ഫോറസ്റ്റ് റേഞ്ച് ഇന്ചാര്ജ് രാജ്കുമാര് ഗൗതം, ഡെപ്യൂട്ടി റീജിയണല് ഫോറസ്റ്റ് ഓഫീസര് രാഹുല് ബല്വന്ത്, ഫോറസ്റ്റ് ഗാര്ഡ് അല്ക്ക ചൗരസ്യ എന്നിവരുടെ നേതൃത്വത്തിലായിരുന്നു ഓപ്പറേഷന്. 1972ലെ വന്യജീവി (സംരക്ഷണ) നിയമപ്രകാരം സംരക്ഷിക്കപ്പെട്ടിട്ടുള്ള ഇനങ്ങളാണ് പിടിച്ചെടുത്ത തത്തകളെന്ന് അധികൃതര് വ്യക്തമാക്കി. പ്രതികള്ക്കെതിരെ നിയമത്തിലെ 2, 9, 39, 48(എ), 48(ബി), 49, 50, 51 വകുപ്പുകള് പ്രകാരം കേസെടുത്തിട്ടുണ്ട്. സംഭവത്തില് കൂടുതല് അന്വേഷണം പുരോഗമിക്കുകയാണ്.















