ലഖ്നൗ: ഔദ്യോഗിക വിദ്യാഭ്യാസ സര്ട്ടിഫിക്കറ്റുകളേക്കാള് വരുംകാലത്ത് പ്രായോഗിക നൈപുണ്യങ്ങള്ക്കായിരിക്കും തൊഴില്മേഖലയില് കൂടുതല് മൂല്യമെന്ന് പ്രധാനമന്ത്രി നരേന്ദ്ര മോദി. കോട്ടും സ്യൂട്ടും ധരിച്ച് സര്ട്ടിഫിക്കറ്റുകളുമായി നടക്കുന്നവരേക്കാള് പ്രായോഗിക പരിജ്ഞാനവും തൊഴില്നൈപുണ്യവുമുള്ളവര്ക്കായിരിക്കും ഭാവിയില് കൂടുതല് അംഗീകാരമെന്നും അദ്ദേഹം പറഞ്ഞു. ലഖ്നൗവില് നടന്ന പൊതുപരിപാടിയില് സംസാരിക്കുകയായിരുന്നു പ്രധാനമന്ത്രി. സ്വര്ണം വാങ്ങുന്നത് നിയന്ത്രിക്കണമെന്ന തന്റെ മുന് അഭ്യര്ത്ഥന ജനങ്ങള് ഏറ്റെടുത്തതായും ഇത് സ്വര്ണവില കുറയാന് കാരണമായെന്നും മോദി അവകാശപ്പെട്ടു. ഒരു വര്ഷത്തേക്ക് അത്യാവശ്യമില്ലെങ്കില് സ്വര്ണം വാങ്ങുന്നത് ഒഴിവാക്കണമെന്ന് നേരത്തെ രാജ്യത്തെ ജനങ്ങളോട് ആവശ്യപ്പെട്ടിരുന്നു. ഈ നിര്ദേശം ജനങ്ങള് അനുസരിച്ചെന്നും അതുവഴി പണം ലാഭിക്കാന് കഴിഞ്ഞതായി പലരും തന്നോട് പറഞ്ഞിട്ടുണ്ടെന്നും അദ്ദേഹം വ്യക്തമാക്കി.
രാജ്യത്തിന്റെ താല്പ്പര്യത്തിനായി വ്യക്തിപരമായ ചില ശീലങ്ങളില് മാറ്റം വരുത്താന് ഇന്ത്യക്കാര് തയ്യാറാണെന്നതിന്റെ തെളിവാണിതെന്നും മോദി പറഞ്ഞു. മുന് പ്രധാനമന്ത്രി ലാല് ബഹദൂര് ശാസ്ത്രി ഒരു നേരത്തെ ഭക്ഷണം ഉപേക്ഷിക്കാന് ആഹ്വാനം ചെയ്തപ്പോള് രാജ്യം അത് ഏറ്റെടുത്തിരുന്നു. സമാനമായ മനോഭാവമാണ് ഇന്നും ജനങ്ങള്ക്കുള്ളതെന്നും അദ്ദേഹം കൂട്ടിച്ചേര്ത്തു. അന്താരാഷ്ട്ര സാഹചര്യങ്ങളും ഇന്ധനവില വര്ധനയുമായി ബന്ധപ്പെട്ട ആശങ്കകളും നിലനില്ക്കുന്ന സാഹചര്യത്തില് ഇന്ധനത്തിന്റെയും സ്വര്ണത്തിന്റെയും ഉപയോഗം കുറയ്ക്കണമെന്ന് പ്രധാനമന്ത്രി നേരത്തെ പൊതുപരിപാടികളിലൂടെ ആഹ്വാനം ചെയ്തിരുന്നു. ഈ നിര്ദേശങ്ങള് ജനങ്ങള് സ്വീകരിച്ചുവെന്നാണ് ലഖ്നൗവിലെ പ്രസംഗത്തില് മോദി ചൂണ്ടിക്കാട്ടിയത്.
ഇന്ത്യയുടെ പരമ്പരാഗത തൊഴില്നൈപുണ്യ മേഖലകളെ അധിനിവേശ ശക്തികള് തകര്ത്തുവെന്നും പ്രധാനമന്ത്രി ആരോപിച്ചു. രാജ്യത്തെ പരമ്പരാഗത കരകൗശല വിദഗ്ധരെയും അവരുടെ വൈദഗ്ധ്യത്തെയും ലക്ഷ്യമിട്ടായിരുന്നു അധിനിവേശക്കാരുടെ നീക്കങ്ങള്. കരകൗശല വിദഗ്ധരുടെ പെരുവിരലുകള് മുറിച്ചുമാറ്റിയതിലൂടെ പരമ്പരാഗത തൊഴില്മേഖലകളെ തകര്ക്കാനാണ് അവര് ശ്രമിച്ചതെന്നും മോദി പറഞ്ഞു.















