ലഖ്നൗ: പശ്ചിമേഷ്യന് സംഘര്ഷത്തെത്തുടര്ന്ന് ആഗോളതലത്തില് ഇന്ധനവിതരണത്തെക്കുറിച്ച് ആശങ്കകള് ഉയര്ന്നെങ്കിലും രാജ്യത്ത് വലിയ പാചകവാതക പ്രതിസന്ധി ഒഴിവാക്കാനായെന്ന് പ്രധാനമന്ത്രി നരേന്ദ്ര മോദി. എല്പിജി ക്ഷാമമുണ്ടാകുമെന്നും വീടുകളില് പാചകം മുടങ്ങുമെന്നും പെട്രോള് പമ്പുകളില് നീണ്ട നിര പ്രത്യക്ഷപ്പെടുമെന്നും ചിലര് പ്രവചിച്ചിരുന്നെങ്കിലും അത്തരമൊരു സാഹചര്യം രാജ്യത്തുണ്ടായില്ലെന്ന് അദ്ദേഹം പറഞ്ഞു. പാചകവാതക വിതരണത്തിലെ ആശങ്കകള്ക്കിടെ പിഎന്ജി (പൈപ്പ്ഡ് നാച്ചുറല് ഗ്യാസ്) കണക്ഷനുകള് വ്യാപിപ്പിക്കാന് സര്ക്കാര് നടത്തിയ ശ്രമങ്ങളും പ്രധാനമന്ത്രി വിശദീകരിച്ചു.
ലഖ്നൗവില് നടന്ന അഞ്ചാമത് ദേശീയ കൗശല് ദീക്ഷാന്ത് സമാരോഹില് സംസാരിക്കുകയായിരുന്നു അദ്ദേഹം. ഹോര്മുസ് കടലിടുക്കിലൂടെയുള്ള എല്പിജി കപ്പല് ഗതാഗതത്തെച്ചൊല്ലി ആശങ്കകള് ഉയര്ന്നപ്പോള് പ്രതിദിനം കുറഞ്ഞത് ഒരു ലക്ഷം പിഎന്ജി കണക്ഷനുകള് നല്കണമെന്ന ലക്ഷ്യമാണ് സര്ക്കാര് മുന്നോട്ടുവെച്ചതെന്ന് മോദി പറഞ്ഞു. എന്നാല് നടപടികള് വേഗത്തിലാക്കിയിട്ടും പ്രതിദിന കണക്ഷനുകളുടെ എണ്ണം 15,00020,000 കടക്കാത്തത് എന്തുകൊണ്ടാണെന്ന് ഉദ്യോഗസ്ഥരോട് പലതവണ ചോദിച്ചിരുന്നതായും അദ്ദേഹം വെളിപ്പെടുത്തി. പ്ലംബര്മാരുടെ കുറവാണ് പ്രധാന തടസ്സമെന്നായിരുന്നു ഉദ്യോഗസ്ഥരുടെ മറുപടി. രാജ്യത്ത് പ്ലംബര്മാരുടെ വലിയ ആവശ്യകതയുണ്ടെന്ന് ചൂണ്ടിക്കാട്ടിയ പ്രധാനമന്ത്രി, തൊഴില് നൈപുണ്യത്തിന്റെ പ്രാധാന്യവും ഇതിലൂടെ വ്യക്തമാകുന്നതായി പറഞ്ഞു.
പാചകവാതക ലഭ്യതയെക്കുറിച്ച് ആശങ്ക പരത്തിയവരുടെ പ്രവചനങ്ങള് യാഥാര്ഥ്യമായില്ലെന്നും മോദി പരിഹസിച്ചു. അടുക്കളകള് പ്രവര്ത്തനരഹിതമാകുമെന്നും പാചകവാതകം കിട്ടാതെ വരുമെന്നും ഇന്ധനം നിറയ്ക്കാന് പമ്പുകള്ക്ക് മുന്നില് നീണ്ട നിര രൂപപ്പെടുമെന്നും പറഞ്ഞിരുന്നെങ്കിലും അങ്ങനെയൊന്നും സംഭവിച്ചില്ലെന്ന് അദ്ദേഹം കൂട്ടിച്ചേര്ത്തു. ഉത്തര്പ്രദേശില് നിന്നുള്ള ലോക്സഭാംഗം എന്ന നിലയില് രാജ്യത്തിന്റെ വിവിധ ഭാഗങ്ങളില്നിന്ന് ചടങ്ങിനെത്തിയ യുവാക്കളെ സ്വാഗതം ചെയ്യുന്നതില് അഭിമാനമുണ്ടെന്നും പ്രധാനമന്ത്രി പറഞ്ഞു.















