തിരുവനന്തപുരം: കൃഷ്ണന്കുട്ടി വധക്കേസില് ജീവപര്യന്തം തടവിന് ശിക്ഷിക്കപ്പെട്ട വിനേഷിനെ കുറ്റവിമുക്തനാക്കി ഹൈക്കോടതി. തിരുവനന്തപുരം അഡീഷണല് സെഷന്സ് കോടതി പുറപ്പെടുവിച്ച ശിക്ഷാവിധി റദ്ദാക്കിയ ഡിവിഷന് ബെഞ്ച് പ്രതിയെ ഉടന് മോചിപ്പിക്കാനും ഉത്തരവിട്ടു. ജസ്റ്റിസുമാരായ രാജ വിജയരാഘവന് വി., കെ.വി. ജയകുമാര് എന്നിവരടങ്ങിയ ബെഞ്ചിന്റേതാണ് നടപടി. പ്രതിയുടെ മാനസികാരോഗ്യവുമായി ബന്ധപ്പെട്ട ചികിത്സാ രേഖകള് ഉണ്ടായിരുന്നിട്ടും വിചാരണക്കോടതി നിയമപരമായ നിര്ബന്ധിത നടപടിക്രമങ്ങള് പാലിച്ചില്ലെന്ന് ഹൈക്കോടതി നിരീക്ഷിച്ചു. ക്രിമിനല് നടപടിച്ചട്ടം അനുശാസിക്കുന്ന വ്യവസ്ഥകള് പാലിക്കാത്തതിനാല് വിചാരണ അസാധുവാണെന്നും കോടതി വ്യക്തമാക്കി.
2012ലാണ് കേസിനാസ്പദമായ സംഭവം നടന്നത്. തിരുവനന്തപുരം വിളവൂര്ക്കലില് വീട്ടുടമയായ കൃഷ്ണന്കുട്ടിയെ വിനേഷ് ഇരുമ്പുകമ്പി കൊണ്ട് അടിച്ചുകൊലപ്പെടുത്തിയെന്നായിരുന്നു കേസ്. ഇതേത്തുടര്ന്ന് വിചാരണക്കോടതി വിനേഷിന് ജീവപര്യന്തം തടവ് വിധിക്കുകയായിരുന്നു. എന്നാല് പ്രതിയുടെ മാനസികാരോഗ്യവുമായി ബന്ധപ്പെട്ട രേഖകള് വിചാരണയില് വേണ്ടവിധം പരിഗണിച്ചില്ലെന്നത് ഹൈക്കോടതിയുടെ ഇടപെടലിന് കാരണമായി. പതിനൊന്ന് വര്ഷത്തിലേറെയായി പ്രതി തടവില് കഴിയുന്നതും രോഗാവസ്ഥയും കുടുംബത്തിന്റെ സാമ്പത്തിക സാഹചര്യവും കോടതി പരിഗണിച്ചു. ഈ സാഹചര്യത്തില് കേസ് വീണ്ടും വിചാരണ ചെയ്യേണ്ടതില്ലെന്നും ഹൈക്കോടതി തീരുമാനിച്ചു.
മകന്റെ ചികിത്സയുടെ ഉത്തരവാദിത്വം ഏറ്റെടുക്കാമെന്ന് അമ്മ കോടതിയില് ഉറപ്പുനല്കിയിട്ടുണ്ട്. ഇതും പരിഗണിച്ചാണ് വിനേഷിനെ ഉടന് മോചിപ്പിക്കാന് ഉത്തരവിട്ടത്. പ്രതിക്കുവേണ്ടി അഡ്വ. ഗോഡ്വിന് ജോസഫ് ഹാജരായി.















