തിരുവനന്തപുരം: മെര്ക്കുറി അടങ്ങിയ ഫെയര്നെസ് ക്രീമുകളുടെ വില്പ്പന തടയാന് സംസ്ഥാനത്ത് നടപടി ശക്തമാക്കാന് നീക്കം. ഇത്തരം ഉല്പ്പന്നങ്ങള് കണ്ടെത്തി തടയുന്നതിനായി എല്ലാ ജില്ലകളിലും പ്രത്യേക സംഘങ്ങളെ രൂപീകരിക്കണമെന്ന ആവശ്യം പരിശോധിക്കാന് മുഖ്യമന്ത്രിയുടെ ഓഫീസ് നിര്ദേശം നല്കി. ആരോഗ്യവകുപ്പിലെ മെഡിക്കല് ഓഫീസര് ഡോ. കെ. പ്രതിഭ നല്കിയ പരാതിയിലാണ് നടപടി. പരാതി പരിശോധിച്ച് തുടര്നടപടികള് സ്വീകരിക്കാന് ആരോഗ്യവകുപ്പ് അഡീഷണല് ചീഫ് സെക്രട്ടറിക്കാണ് മുഖ്യമന്ത്രിയുടെ ഓഫീസ് നിര്ദേശം നല്കിയിരിക്കുന്നത്. മെര്ക്കുറി അമിതമായി അടങ്ങിയ സൗന്ദര്യവര്ധക ഉല്പ്പന്നങ്ങള് ഗുരുതര ആരോഗ്യപ്രശ്നങ്ങള്ക്ക് കാരണമാകുമെന്ന ആശങ്ക ശക്തമായ സാഹചര്യത്തിലാണ് നീക്കം.
മലപ്പുറത്ത് ഫെയര്നെസ് ക്രീം ഉപയോഗിച്ച 17കാരിക്ക് ഗുരുതര വൃക്കരോഗം കണ്ടെത്തിയ സംഭവം നേരത്തെ വലിയ ചര്ച്ചയായിരുന്നു. ഉയര്ന്ന അളവില് മെര്ക്കുറി അടങ്ങിയ ക്രീം ഒരു വര്ഷത്തോളം ഉപയോഗിച്ചതിന് പിന്നാലെ പെണ്കുട്ടിക്ക് മെംബ്രനസ് നെഫ്രോപതി എന്ന വൃക്കരോഗം സ്ഥിരീകരിച്ചതായാണ് റിപ്പോര്ട്ട്. സംഭവം പുറത്തുവന്നതിന് പിന്നാലെ ക്രീമിന്റെ ഇന്സ്റ്റഗ്രാം പേജ് അപ്രത്യക്ഷമായതായും വിവരമുണ്ട്. ഇതോടെ ഉല്പ്പന്നത്തിന്റെ വില്പ്പനയും അതിന്റെ സുരക്ഷയും സംബന്ധിച്ച ആശങ്കകള് വര്ധിച്ചു.
വിഷയത്തില് ബാലാവകാശ കമ്മീഷനും ഇടപെട്ടിട്ടുണ്ട്. വാര്ത്ത ശ്രദ്ധയില്പ്പെട്ടതിനെ തുടര്ന്ന് കമ്മീഷന് കേസെടുക്കുകയും ആരോഗ്യവകുപ്പ് ഡയറക്ടര്, സംസ്ഥാന പൊലീസ് മേധാവി, ഡ്രഗ്സ് കണ്ട്രോളര് എന്നിവരില് നിന്ന് വിശദീകരണം തേടുകയും ചെയ്തു. മെര്ക്കുറി അടങ്ങിയ ക്രീമുകളുടെ വില്പ്പനയും വിതരണവും തടയുന്നതിനായി സംസ്ഥാന വ്യാപക പരിശോധനയും നിരീക്ഷണവും ആവശ്യമാണെന്ന നിലപാടിലാണ് പരാതി നല്കിയ മെഡിക്കല് ഓഫീസര്. മുഖ്യമന്ത്രിയുടെ ഓഫീസ് നിര്ദേശത്തെ തുടര്ന്ന് ആരോഗ്യവകുപ്പ് സ്വീകരിക്കുന്ന തുടര്നടപടികള് നിര്ണായകമാകും.















