ആരാധകരുടെ ഏറെ നാളത്തെ കാത്തിരിപ്പിനൊടുവിൽ പൂമരക്കപ്പൽ ഇന്ന് കരയ്ക്കടുക്കും. അതേത് കപ്പലെന്ന് അതിശയിക്കണ്ട. കാളിദാസ് ജയറാം നായകനായെത്തുന്ന പൂമരം സിനിമ ഇന്ന് പ്രദർശനത്തിന് എത്തുകയാണ്. സംശയിക്കേണ്ട ഇത്തവണ റിലീസിംഗ് തീയതിയിൽ ഇതുവരെ മാറ്റമൊന്നും ഇല്ല.
കാത്തുകാത്തിരുന്ന് അവസാനം പൂമരം പൂക്കുകയാണ്. പാട്ട് പുറത്തിറങ്ങി ഒന്നര വർഷത്തിന് ശേഷമാണ് സിനിമ പ്രദർശനത്തിനെത്തുന്നത്. നേരത്തെ നിരവധി തവണ തീയതി പ്രഖ്യാപിച്ചെങ്കിലും അകാരണമായി നീളുകയായിരുന്നു. റിലീസിംഗ് വൈകുന്നതുമായി ബന്ധപ്പെട്ട് കാളിദാസിനെയും സംവിധായകനെയും പരിഹസിച്ച് നിരവധി ട്രോളുകളും ഇതിനകം ഇറങ്ങി. ചിലപ്പോൾ ട്രോളുകളിലൂടെ ഇത്രയും ജനശ്രദ്ധയാകർഷിച്ച മറ്റൊരു ചിത്രം വേറെ കാണില്ല. ചിത്രത്തിലെ പാട്ടുകൾ നേരത്തെ തന്നെ പ്രേക്ഷകർ ഏറ്റെടുത്തിരുന്നു.
എല്ലാ തവണയും പോലെ കാളിദാസ് തന്നെയായിരുന്നു ചിത്രത്തിന്റെ റിലീസിംഗ് തീയതി ഫേസ്ബുക്കിലൂടെ അറിയിച്ചത്. പിന്തുണക്കും സ്നേഹത്തിനും നന്ദിയെന്ന കുറിപ്പോടെ ചിത്രത്തിന് ലഭിച്ച യു സർട്ടിഫിക്കറ്റും പോസ്റ്റ് ചെയ്തിരുന്നു.
ആക്ഷൻ ഹീറോ ബിജുവിന് ശേഷം എബ്രിഡ് ഷൈൻ സംവിധാനം ചെയ്യുന്ന സിനിമയാണ് പൂമരം. 2016 സെപ്റ്റംബറിലാണ് പൂമരത്തിന്റെ ഷൂട്ടിംഗ് ആരംഭിക്കുന്നത്. ജയറാമിന്റെ മകൻ നായകനാകുന്നതിനാൽ തന്നെ ചിത്രം വാർത്തകളിൽ നിറഞ്ഞിരുന്നു.
ഏതായാലും ബാലതാരമായി മലയാളി മനസ്സ് കീഴടക്കിയ കാളിദാസിന്റെ നായകനായുള്ള പ്രകടനം കാണാനുള്ള കാത്തിരിപ്പ് അവസാനിച്ച സന്തോഷത്തിലാണ് ആരാധകർ. പൂമരത്തിലൂടെ പുതിയൊരു താരോദയത്തിന് വഴിയൊരുങ്ങുമെന്ന പ്രതീക്ഷയും ആരാധകർക്കുണ്ട്.
