കൊൽക്കത്ത: ഇന്ത്യൻ ക്യാപ്ടൻ വിരാട് കോലിയെ പ്രശംസിച്ച് മുൻ ഇന്ത്യൻ ക്യാപ്ടൻ സൗരവ് ഗാംഗുലി . 2019 ലെ ലോകകപ്പ് ഫൈനലിൽ ഇന്ത്യ വിജയിച്ചാൽ കോലി ഷർട്ടൂരി വീശുമെന്ന് തനിക്ക് ഉറപ്പാണെന്നും ഗാംഗുലി പറഞ്ഞു.ക്രിക്കറ്റ് ചരിത്രകാരൻ ബോറിയ മജുംദാറിന്റെ ഇലവൻ ഗോഡ്സ് ആൻഡ് എ ബില്യൺ ഇന്ത്യൻസ് എന്ന പുസ്തകത്തിന്റെ പ്രകാശനം കോലിയോടൊപ്പം നിർവഹിക്കുകയായിരുന്നു ഗാംഗുലി.
ഈ വർഷം നടക്കുന്ന ഇംഗ്ളണ്ട് – ഓസ്ട്രേലിയ പര്യടനങ്ങളിൽ ഇന്ത്യൻ ടീം മികച്ച പ്രകടനം കാഴ്‌ച്ച വയ്‌ക്കും. കോലിയെപ്പോലെ ഇത്ര നന്നായി ഓസ്ട്രേലിയയിൽ കളിച്ച മറ്റൊരു കളിക്കാരനുണ്ടോ എന്ന് സംശയമാണെന്നും ഗാംഗുലി പറഞ്ഞു. ക്യാപ്ടൻസി കോലിയെ ബാധിക്കുന്നില്ലെന്നത് എടുത്തു പറയേണ്ട കാര്യമാണെന്നും അദ്ദേഹം ചൂണ്ടിക്കാട്ടി.
കോലിക്ക് ലഭിച്ചിരിക്കുന്നത് ഒരു പറ്റം മികച്ച കളിക്കാരെയാണ് .ഇന്നിംഗ്സിൽ എറ്റവും കുറഞ്ഞത് 350 റൺസ് എടുക്കാൻ കഴിവുള്ള ബാറ്റ്സ്മാന്മാരും 20 വിക്കറ്റും വീഴ്‌ത്താൻ കഴിയുന്ന ബൗളർമാരുമാണ് ടീമിലുള്ളത്. കോലിയുടെ നേതൃത്വത്തിൽ ഇന്ത്യൻ ടീമിന്റെ സ്വഭാവം തന്നെ മാറിയെന്നും ഗാംഗുലി വ്യക്തമാക്കി.
2019 ൽ ലോകകപ്പ് ജയിക്കുകയാണെങ്കിൽ കോലി ഷർട്ടൂരി വീശുമെന്നാണ് താൻ വിശ്വസിക്കുന്നതെന്നും ചെറു ചിരിയോടെ ഗാംഗുലി പറഞ്ഞു. ഓക്സ്ഫഡ് സ്ട്രീറ്റിൽ ട്രോഫിയുമായി കോലി എത്തുമെങ്കിൽ അയാൾ ഷർട്ടൂരുക തന്നെ ചെയ്യുമെന്നും ഗാംഗുലി പറഞ്ഞു. 2002 ലെ നാറ്റ്‌വെസ്റ്റ് കിരീടം നേടിയപ്പോൾ അന്ന് ക്യാപ്ടനായിരുന്ന ഗാംഗൂലി ഷർട്ട് ഊരി വീശിയത് ഏറെ വിവാദങ്ങൾക്ക് വഴി തെളിച്ചിരുന്നു
