മോസ്‌കോ: ലോകകപ്പ് ഫുട്‌ബോളില്‍ യുറുഗ്വായ് ഗ്രൂപ്പ് എയിലെ ജേതാക്കള്‍. റഷ്യയെ എതിരില്ലാത്ത മൂന്ന് ഗോളുകള്‍ക്ക് കീഴടക്കിയാണ് യുറുഗ്വായ് ഗ്രൂപ്പില്‍ മുന്നിലെത്തിയത്. ഗ്രൂപ്പിലെ രണ്ടാം മത്സരത്തില്‍ ഈജിപ്തിനെ സൗദി അറേബ്യ കീഴടക്കി. ഒന്നിനെതിരെ രണ്ട് ഗോളുകള്‍ക്കാണ് സൗദി അറേബ്യ ജയം നേടിയത്.
ആദ്യ രണ്ട് മത്സരങ്ങളില്‍ ഗോള്‍ വേട്ടയുമായി മുന്നേറിയ റഷ്യ യുറുഗ്വായുടെ പ്രതിരോധക്കരുത്തിന് മുന്നില്‍ മുട്ടുമടക്കി. ലാറ്റിനമേരിക്കന്‍ മുന്നേറ്റത്തില്‍ തുടക്കത്തിലെ പകച്ചുപോയ ആതിഥേയരെ ഞെട്ടിച്ച് പത്താം മിനുറ്റില്‍ ലൂയി സുവാരസിന്റെ ഗോള്‍. എഡിന്‍സന്‍ കവാനിയെ ഫൗള്‍ ചെയ്തതിന് ലഭിച്ച ഫ്രീക്വിക്ക് സുവാരസ് വലയിലെത്തിച്ചു. 23 ാം മിനിറ്റില്‍ റഷ്യയ്‌ക്ക് തിരിച്ചടിയായി ഡെനിസ് ചെറിഷേവിന്റെ സെല്‍ഫ് ഗോള്‍.
ആദ്യ പകുതിയില്‍ രണ്ട് ഗോളിന് മുന്നിട്ടുനിന്ന യുറുഗ്വായ് രണ്ടാം പകുതിയിലും ആക്രമണം തുടര്‍ന്നു. തൊണ്ണൂറാം മിനിട്ടില്‍ എഡിന്‍സണ്‍ കവാനി യുറുഗ്വായുടെ പട്ടിക പൂര്‍ത്തിയാക്കി. ഇഗോര്‍ സ്‌മോള്‍നിക്കോവ് ചുവപ്പു കാര്‍ഡ് കണ്ട് പുറത്തായതോടെ 10 പേരുമായാണ് റഷ്യ മത്സരം പൂര്‍ത്തിയാക്കിയത്.
ഗ്രൂപ്പ് എയിലെ രണ്ടാം മത്സരത്തില്‍ ഈജിപ്തിനെ ഒന്നിനെതിരെ രണ്ട് ഗോളുകള്‍ക്കാണ് സൗദി അറേബ്യ കീഴടക്കിയത്. 22 ാം മിനിറ്റില്‍ മുഹമ്മദ് സലായിലൂടെ ഈജിപ്ത് മുന്നിലെത്തി. 46 ാം മിനിറ്റില്‍ ലഭിച്ച പെനാല്‍റ്റി വലയിലെത്തിച്ച സല്‍മാന്‍ അല്‍ഫജറാണ് സൗദിയ്‌ക്ക് സമനില സമ്മാനിച്ചത്. മത്സരം തീരാന്‍ നിമിഷങ്ങള്‍ മാത്രം ബാക്കി നില്‍ക്കെ സലേം അല്‍ ദെവ്‌സാരിയാണ് സൗദി അറേബ്യയെ ജയത്തിലെത്തിച്ചു.
