തിരുവനന്തപുരം: തിരഞ്ഞെടുപ്പ് പെരുമാറ്റചട്ട ലംഘനങ്ങള് എല്ലാ ദിവസവും റിപ്പോര്ട്ട് ചെയ്യാന് ജില്ല കളക്ടര്ക്ക് മുഖ്യ തിരഞ്ഞെടുപ്പ് ഓഫീസറുടെ നിര്ദേശം. അതാത് ജില്ലകളില് പെരുമാറ്റചട്ട ലംഘനങ്ങള്ക്കെതിരെ സ്വീകരിക്കുന്ന നടപടികളുടെ റിപ്പോര്ട്ട് എല്ലാ ദിവസവും വൈകിട്ട് അഞ്ചിന് മുന്പ് നല്കണമെന്നാണ് മുഖ്യ തിരഞ്ഞെടുപ്പ് ഓഫീസര് നിര്ദേശം നല്കിയിരിക്കുന്നത്. നോഡല് ഓഫീസര് കെ.ജീവന് ബാബുവിനാണ് റിപ്പോര്ട്ടുകള് പരിശോധിക്കാനുള്ള ചുമതല.
പൊതുനിരത്തുകളിലും, തദ്ദേശസ്വയംഭരണ സ്ഥാപനങ്ങളുടെ ഉടമസ്ഥതയിലുള്ള സ്ഥലങ്ങള്, പൊതുഗതാഗത സംവിധാനങ്ങള് എന്നിവിടങ്ങളില് പെരുമാറ്റചട്ടം ലംഘിക്കുന്ന വിധത്തില് സ്ഥാപിച്ചിട്ടുള്ള പരസ്യങ്ങള് ഉടനെ നീക്കം ചെയ്യാനും കളക്ടര്മാര്ക്ക് നിര്ദ്ദേശം നല്കിയിട്ടുണ്ട്. ഇവ നീക്കം ചെയ്യുന്നതിനാവശ്യമായ സുരക്ഷ പൊലീസ് നല്കണമെന്നും നിര്ദ്ദേശിച്ചിട്ടുണ്ട്. മതപരമായ ചിഹ്നങ്ങള്, ചിത്രങ്ങള് എന്നിവ ഉപയോഗിച്ച് പ്രചാരണം നടത്തുന്നുവെന്ന പരാതികളും നോഡല് ഓഫീസര് പരിശോധിക്കുമെന്ന് വ്യക്തമാക്കിയിട്ടുണ്ട്.